«Батыс Еуропа - Батыс Қытай»
көлік дәлізінің Ресейге тиесілі бөлігі 2020 жылға қарай ретке келтіріледі. "Ресей көлік министрі Максим Соколов Орынборда
өткен кеңесте осыны мәлімдеді", - деп жазады "Айқын" газеті. Сондай-ақ ол қаржылық
ресурстарды осы жобаға топтастырудың
маңыздылығына тоқталды. Айтуынша, Ресейдің транзиттік әлеуетін толық
көлемде пайдалану Азия-Тынық мұхиты
аймағы елдерімен экономикалық қатынасты
дамытуға ықпал етеді.
Сондай-ақ,
Ресей үкіметінің өкілі Қазақстан мен Қытайдан қалыспау керектігін қадап айтты. Қазақстан бастамашы болған
«мега-жоба» Ресей аумағында тұралап қалған.
Ал Аспан асты елі өздеріне
тиесілі бөлікті толық ашуға даяр. «Батыс Еуропа - Батыс Қытай» жобасының
Қазақстандағы бөлігі 2015 жылы толық
аяқталады деп жоспарлануда. Жобадан үнемделген қаржыға басқа жолдарды қайта
салу қарастырылып жатыр. Мәселен, 75
шақырымдық «Күрті-Бурылбайтал» жолын реконструкциялау жөнінде келіссөздер
басталды.
Айта өтейік, «Батыс Еуропа - Батыс Қытай» жолының жалпы ұзындығы 8,5 мың шақырым. Оның
2,8 мыңдайы Қазақстанды басып өтеді.
Ләйлә ҚАЗИЯҚПАРОВА
