Бүгін барша мұсылман қауымы үшін қасиетті Ораза айт мерекесі басталды.
Рамазан айында 30 күн ораза тұтқан жамағат алдағы үш күнде бір бірін ұлық
мерекемен құттықтап мәре-сәре болады. Мешіттерде таңертең айт намазы оқылды.
Әрбір шаңырақта мерекенің құрметіне дастархан жайылды. Мемлекет басшысы
Нұрсұлтан Назарбаев Қазақстан халқын Ораза айт мерекесімен құттықтады.
"Бұл мейрам әлемнің барша
мұсылмандары рухани тазаруға ұмтылатын Рамазан айының аяқталғанын білдіреді. Осы кезеңде қайырымды
істер атқарып, біздің көмегіміз бен жанашырлығымызға зәру жандарға қамқорлық
көрсетуге деген ізгі ниет пен ықылас арта түседі. Ислам адамзат баласын
татулыққа, тыныштық пен тұрақтылыққа үндейді. Осынау биік құндылықтар тек
мұсылман қауымын ғана емес, бүкіл Қазақстан халқын ұйыстыра түседі. Ораза айт
барлық отандастарымыздың бірлігін арттыратын мереке болып саналады. Қазақстан
қоғамы бай рухани мұрасын, өзара сыйластық пен келісімге негізделген іргесі
берік қарым-қатынастарын орынды мақтан тұтады. Барша қазақстандықтарды осы
дәстүрлерді барынша нығайтып, жасампаз құндылықтарымызды қастерлеуге
шақырамын. Қасиетті Ораза айт халқымызға рухани серпіліс, шаңырақтарыңызға
бақ-береке әкелсін!" - делінген құттықтауда.
Базаргүл
ОТЫНШИЕВА
