Ұлт денсаулығы - өскелең ұрпақтан басталады. «ҚазМұнайГаз» ұлттық
компаниясы жыл сайынғы дәстүр бойынша балалардың жазғы демалысын жоғары
деңгейде ұйымдастыруда. «Көкшетау» ұлттық паркі аумағында орналасқан «Сұңқар»
сауықтыру кешенінде өндірісте жұмыс атқаратын қарапайым мұнайшылардың балалары
демалады.
Жазғы лагерьдегі демалыс балалық шақтан есте қалар естелік екендігі
белгілі. Дөңгеленіп би билеп, қол ұстасып ән шырқап, жаңа дос тауып, табиғатпен
қауышатын кезең бұл. «Сұңқар» сауықтыру орталығының биылғы жазғы семестрі 15
күннен 5 маусымға бөлінді, бір маусымда 2000 жуық бала демалады. Дәл қазіргі
төртінші маусымға биыл Батыс Қазақстан облысының балдырғандары келді.
Әсел Ұмарғалиева:
Мен Жаңаөзен қаласынан келдім. Көкшетау қаласы өте тамаша. Бұл жерге мен
екі рет келдім. Бұл Зеренді жерінің ауасы керемет.
Демалыс маусымы бағдарламасына балалардың жеке және ұжымдық
жауапкершілігін, еңбексүйгіштік қасиеттерін тәрбиелеуге әсер ететін танымдық
және командалық ойындар кіреді. Алайда «ҚазМұнайГаз» ұлттық компаниясы
балаларға тосын сый жасады. Олимпиада чемпионы Юрий Мельниченко мен көркем
гимнастикадан Азия чемпионы Анна Алябьева балаларға шеберлік класын
ұйымдастырды.
Юрий Мельниченко, олимпиада чемпионы:
Мұндай шаралардың маңызы өте зор. Балалардың, жалпы бұқараның спортқа деген
құлшынысын арттырып, салауатты өмір салтын насихаттау өз жемісін берері анық.
Балалардың қызығушылығы өте зор.
Балалар үшін барлық жағдай жасалған. Кешен аумағында баскетбол, волейбол,
футбол алаңдары бар. Бұдан басқа «Сұңқар» сауықтыру орталығы аумағында 2
бассейн және спорт кешендері орналасқан. Бұл аталғандар тек баларға көрсетілген
көңіл емес «ҚазМұнайГаз» ұлттық компаниясының өндірістегі қарапайым жұмысшылар
алдындағы әлеуметтік жауапкершілігі десе де болады.
Ерік Нұрғалиев, "ҚазМұнайГаз - сервис" ЖШС бас директорының
орынбасары:
"ҚазМұнайГаз" компаниясының негізгі мақсаты - Қазақстанның
түкпір-түкпіріндегі балаларды өз отанының табиғатымен таныстырып, оларды өзге
өңірлерге саяхатқа шығару. Әсіресе балалардың денсаулығын қалпына келтіру
басты назарда.
Демалыс аясында Көкшетау, Бурабай және Астана қалаларының мұражайларына
саяхат ұйымдастырылмақ. Алғаш рет жазғы семестр шеңберінде «Сұңқарда» балалар
демалысын ұйымдастыру жобасы 2001 жылы іске асырылған. 13 жыл ішінде мұнда 10
мыңнан астам бала демалды.
Жұрағат БАМАН
