Футболдан Чемпиондар лигасының топтық кезең ойындары басталды. «Б» тобында
сынға түскен Мадридтің «Реал» клубы ірі есеппен жеңіске жетті. Бұл сында
Швейцарияның «Базель» командасын қабылдаған Карло Анчелоттидің шәкірттері 5:1 есебімен үздік шықты.
«Сантьяго Бернабеу» стадионында өткен кездесудегі алғашқы голды қонақтар өз
қақпасына соғып алды. Начоның соққысын қайтармақ болған қорғаушы Марек Сухи
дөрекі қателесті. Бұл голдан кейін шабыттанған алаң иелері келесі сәтте есепті еселеді. Бұл
жолы жеке шеберлігімен көзге түскен Гарет Бейл командаластарының қошеметіне
бөленді. Келесі шабуылда Криштиану Роналду мергендігімен танылды. Бейлдің пасынан
кейін допқа бірінші жеткен шабуылшы мүлт кетпеді.
Биылғы маусымда патшалық клуб
қатарына қосылған Хамес Родригес те алаңнан голсыз кетпеді. «Базель» командасы
қорғаушыларының қателігін сәтті пайдаланған ол есепті 4:0-ге жеткізді. Үзіліске дейін намысқа тырысқан
қонақтар бір голмен жауап қайтарды. Бірақ, швейцариялық ұжымның қуанышы көпке
созылмады. Кездесудің аяқталуына санаулы минуттар қалған Кәрім Бензема бұл
ойындағы соңғы нүктені қойды.
Самат ҚАНАҒАТОВ
