Теміртау қаласында да көлік қозғалысы
тоқырады. Кеншілер шаһарында АИ-80 маркалы
бензин жоқ болып кетті. Осы себепті қоғамдық көліктердің бірсыпырасы жұмысын тоқтатуы
мүмкін.
Жанармай тапшылығының қиындығын
теміртаулықтар демалыс күндері сезінді. Қалалық бағыттарда қатынайтын
нөмірі 3-ші және 15-ші автобустар жұмысқа шықпай қалды. Қоғамдық көлік
қаңтарылып, жүргізушілер талон іздеп әуре болып жүргенде, «Ескі қала» ауданының
тұрғындары орталыққа жете алмай қиналды.
Бүгін жағдай әкімдіктің араласуымен ғана
түзелгендей болды. Жанар-жағармай құю бекеттерінде 3-4 күнге жетер-жетпес 5
тоннадай бензин табылған. Бұл қор таусылған
соң не болары белгісіз. Қала билігі қазір сұйық отын сатып алу жөнінде ірі
компаниялармен келіссөздер жүргізуде.
Алтынбек Есмырзаев, Теміртау қаласы әкімінің орынбасары:
Біз қазір «ҚазМұнайГаз»-бен бензин алу жөнінде келісіп жатырмыз. Қоғамдық көліктер жүріп жатыр, жүре береді де.
Айта кетерлігі, шаһардағы жолаушы
тасымалдаумен айналысатын 8 кәсіпорын алдын ала талондар сатып алып, жұмысты
үзбей жүргізген. Ал 3 және 15-ші автобустар бағыты қолма-қол төлем жүйесі бойынша жұмыс істегендіктен тапшылыққа
тап болған. Даудың соңы тасымалдаушы компаниялардың тарифті көтеруді талап
етуімен тынды. АИ-80 маркалы бензинінің бағасы болса, шарықтап тұр.
Андрей Смирнов, Теміртау қаласы автопаркінің жүргізушісі:
Әрі қарай не
болатынын білмейміз. Бізге ештеңені ашып айтпайды. Әзірге литрі 105 теңгеден
талон таптық.
Азамат АЛДОҢҒАРОВ
