Әлемдік мұнай экспорттаушы елдер ұйымы «қара алтын» бағасы баррелліне 40 доллар болған күнде де өндірісті қысқартпақ
емес. Бұл туралы Біріккен Араб Әмірлігінің энергетика министрі Сухаиль
әл-Мазруи мәлімдеді, деп жазды «Блумберг».
Сондай-ақ, Әл-Мазруи ОПЕК нарықтағы
мұнай бағасына байланысты алдағы 3 айда ешқандай жиын өткізбейді деді. Бағаны реттеуге қатысты басқосу тек 6 айдан соң өтуі
мүмкін. Осылайша ұйым мүшелері нарықтың өзін-өзі реттеуіне мүмкіндік беріп
отыр. Мұнай экспорттаушы елдер ұйымының бас хатшысы Абдалла Сәлем әл-Бадри де
пікірін білдірді. Ол, «қара алтын» құны
күтілген деңгейден төмен болса да, Парсы шығанағы елдері мұнай өндірісі мен
барлау жұмыстарына инвестиция құюын жалғастыра беретінін айтады. Сондай-ақ, бас хатшы
өндірісті үдету Ресей мен Иранға қарсы қабылданып отырған шара емес дейді.
Еске салайық, өткен жұмада Нью-Йорк
саудасында Brent маркалы мұнай барреліне 62,90 доллар, ал WTI соңғы 4 жылда
алғаш рет 58 доллар деңгейіне түсті.
Азамат АЛДОҢҒАРОВ