«Дүние жүзі бойынша халықтардың өзара татулық-бірлікте өмір сүруі және
интернационализм бейбітшіліктің кепілі болып келеді». Президенттікке кандидат
Тұрғын Сыздықов өзінің сайлауалды насихат шаралары аясында осындай пікірлерімен
бөлісті. Ақмола облысы Ақкөл қаласының тұрғындарымен кездесуінде үміткер өзі
сайлауға түскелі отырған партия жұмысына және сайлауалды тұғырнамасының басты
қағидаттарына тоқталып өтті. Тұрғын Сыздықовтың тұғырнамасы Батыс және Шығыс
Қазақстан облыстарында да кеңінен насихатталып жатыр.
Кандидат Тұрғын Сыздықовтың Шығыс Қазақстандағы сайлауалды штабында 200-дей
адам белсенді жұмыс істеуде. Бүгінде үміткердің тұғырнамасын жан- жақты түсіндіру
жұмыстары жүріп жатыр. Халықтар арасындағы бейбітшілік пен келісім ел бірлігін
қамтамасыз етуге құрылғанын олар сайлаушыларға жеткізуге тырысуда. Дәстүрлі
отбасылық құндылықтар, шыдамдылық пен үлкенге құрмет біздің ұрпаққа ең керекті
қасиеттер екені үміткердің тұғырнамасында қамтылған.
Шыңғыс Байдәулетов, ҚР Президенттігіне кандидат Т.Сыздықовтың ШҚО
сайлауалды штабы жетекшісі:
Батыстың көзқарасы біздің жастарға өте кері әсерін тигізіп жатыр. Болашақ
ұрпақты тәрбиелеу үшін өзіміздің құндылықтар, өз көзқарастарымыз қажет. Тұрғын
Ысқақұлының платформасы соған құрылады.
«Әлем халқы тұрақтылық пен өркендеуді сақтаудың маңыздылығын түсініп
келеді, ол үшін шыдамдылық пен төзімділік идеяларын алға тарту қажет». Осылай
деген кандидат адамгершілік ұстанымдарын бірінші кезекке шығару тұрғысындағы
ойын жеткізді. Сонымен қатар, үміткер марксизм-ленинизм идеяларына да тоқталды.
Тұрғын Сыздықов, Қазақстан Республикасы Президенттігіне кандидат:
Коммунистік халықтық партиясы қызметінің негізінде марксизм-ленинизм идеялары
жатыр. Ол үздіксіз дамып, жетіліп отыратын шығармашылық білім.
Қазақстан коммунистік халық партиясының орталық комитеті хатшысы кандидат
Тұрғын Сыздықовтың Батыс Қазақстан облыстық штабында 15 сенімді өкілі жұмыс
істейді. Олар үміткердің 6 мың дана үгіт плакаттары мен сайлауалды тұғырнамасын
арнайы жерлерге ілуде.
Айымгүл Қошкенбаева, ҚР
Президенттігіне кандидат Т.Сыздықовтың сенімді өкілі:
Біздің штабтың әр ауданда
өзінің бөлімшелері бар және де өзінің өкілдері бар. Біздің мақсатымыз - халыққа
біздің кандидаттың тұғырнамасын жеткізу болып табылады.
Кандидат Тұрғын Сыздықов: «Тегін білген текті елдің ұрпағымыз. Халқымыздың
ата дәстүрі мен ұлттық құндылықтарын жастардың бойына сіңіре білуіміз қажет»,-
деп есептейді.
Базаргүл ОТЫНШИЕВА
