Солтүстік Қазақстандық диқандарды қаржылай қолдауға 4 млрд. теңге
бөлінді. Бұл жөнінде азық-түлік келісім-шарт корпорациясының өкілдері
хабарлайды. 5 пайыз үстеме ақымен берілетін демеуқаржы көктемгі егіс
жұмыстарына бағытталмақ.
Бөлінген қаражат көлемі былтырғымен салыстырғанда 3
еседей көп. Шаруалар мемлекеттен алған субсидияны өнім түрінде қайтара алады.
Бұл кәсіпкерлерге жасалған жеңілдік. Қазір астық нарығында қиын жағдай
қалыптасып отыр.
Өткен жылы жауын-шашынның мол түсуіне байланысты диқандар
дәнді дер кезінде жинай алмай, егіннің сапасы нашарлады. Салдарынан бірқатар
кәсіпорын шығынға батып, былтыр көктемде алған қарызынан құтыла алмады.
Бүгінде
Солтүстік Қазақстандық шаруалардың азық-түлік келісім-шарт корпорациясы
алдындағы берешегі 234 млн. теңгені құрайды. Компания өкілі, кәсіпкерлердің жағдайына
түсіністікпен қарайтынын айтты.
Рустам Жаңатаев, «Азық-түлік келісім-шарт корпорациясы» ҰК» АҚ СҚО бойынша өкілдігінің директоры:
Өткен жылы бізге мемлекеттен 1,5 млрд теңге
бөлініп, 103 шаруашылық қаржыландырылды. Биыл қаралған 4 млрд. теңгенің
арқасында 300 кәсіпкерге көмектесеміз деп жоспарлап отырмыз. Жалпы, корпорация
соңғы 5 айдың ішінде диқандардан 284 мың тонна бидай сатып алды.
Абзал
ҚҰРМАНКИН
