«Нұр Отан» партиясының кезекті
XVI съезіне қатысушы делегаттар 9 наурыздан бері Астанаға ағылып келуде. Бүгін
бас қалаға бірнеше аймақтың делегаттары жиналды. Биылғы съезге қатысушылардың
20 пайыздан астамы - бастауыш партия ұйымдарының өкілдері болмақ.
Кешелі бері съезге келушілердің
көшін жалғаған аймақтың бірі - Шығыс Қазақстан облысы. Өңірден Астанаға 70-тен
аса делегат келді. Арасында дәрігерлер, мектеп және жоғары оқу орнының
оқытушылары бар. Делегаттардың бұл съезден күтері көп.
Ержан Құттыбаев, «Нұр Отан»
партиясы XVI съезд делегаты:
Съезде бүгінгі күннің өзекті
мәселелері талқыланады деп ойлаймын. Мына әлемдік экономикалық кризис. Содан
кейін президент сайлауына байланысты маңызды шешімдер қабылданады деп ойлаймын.
Ең көп делегат Қарағанды
облысынан келді. 130-ға жуық адам. Олардың дені - кеншілер, металлургтер,
энергетик және механик мамандар. Делегаттар, бұл съездің ел өміріне оң әсер
етеріне, сенімді.
Яқия Асатов, «Нұр Отан»
партиясы XVI съезд делегаты:
Бізде тек қана Президентті
қолдау - біздің келген мақсатымыз.
Ертең Астанада өтетін «Нұр
Отан» партиясының XVI съезіне еліміздің барлық аймағынан 1200-ден аса делегат
қатысады деп күтілуде. Айта кетейік, биылғы съезд - партияның бастауыш ұйымдарының төрағалығымен өтпек. Бүгінде 850
мыңға тарта партия мүшелері 6000-ға жуық бастауыш партия ұйымдарына бірігіп
отыр. Бұл елдегі әрбір тоғызыншы сайлаушы деген сөз.
Тоғжан ЖАЛҒАСБЕКҚЫЗЫ
