Бейбітшілік, адамгершілік, интернационализм - адамзаттың бүгінгі даму
кезеңіндегі басты құндылықтар. Бұл Қазақстан Президенттігіне кандидат Тұрғын
Сыздықовтың пікірі. Үміткер Щучинск қаласындағы «Қазақстан темір жолы» ұлттық
компаниясына қарасты Локомотив ДЕПО-сы жұмысшыларымен кездесуінде осы
тақырыптарды тарқатып айтты. Ал кандидаттың Қызылорда және Павлодар
облыстарындағы сайлауалды штабтары үгіт-насихат жұмыстарын қарқынды жүргізіп
жатыр.
«Ұрпақтан-ұрпаққа мирас болып қалатын жалпы адамзаттық құндылық ретінде
бейбітшілік пен келісімді айта аламыз»,- деді ел Президенттігіне үміткер Тұрғын
Сыздықов. Ол өз сайлаушыларын тұрақтылықты бағалауға үндейді. Қазақстан
коммунистік халық партиясы орталық комитетінің хатшысы, кандидат Сыздықовтың
сайлауалды бағдарламасы ел ішінде насихатталып жатыр.
Гаухар Нұғыманова, ҚР Президенттігіне кандидат Т.Сыздықовтың сенімді өкілі:
Қазақстанда қаншама ұлт өкілдері бейбітшілік пен келісімде ғұмыр кешуде.
Өзара түсіністік пен тұрақтылық - бұл біздің ең үлкен байлығымыз. Және осыны
жастардың санасына сіңіруіміз қажет.
Президенттікке үміткер Тұрғын Сыздықовтың Павлодар облыстық штабында 19
сенімді өкілі жұмыс істейді. Сондай-ақ, облыстың 14 ауданында Қазақстан
коммунистік халық партиясының бөлімшелері бар.
Нұрлан Рақымжанов, ҚР Президенттігіне кандидат Т.Сыздықовтың сенімді өкілі:
Осы Павлодар облысында 5 билборд орнатылып жатыр. Қаланың өзінде, Павлодар
облысында мынадай материалдар таратылып жатыр халықтың арасында.
Қызылорда облысында да 5 билборд ілініп, 8 мыңға жуық үгіт материалдары
таратылды. Сонымен қатар, кандидаттың сенімді өкілдері аудан ортылықтары мен
ауылдарда сайлаушылармен бернеше кездесулер ұйымдастырды. Өңірде үміткердің 11
сенімді өкілі жұмыс істейді.
Марат Пірманов, ҚР Президенттігіне кандидат Т.Сыздықовтың сенімді өкілі:
Қазіргі таңда Қызылорда облысының орталық сайлау комиссиясымен тығыз жұмыс
жасалуда. Бақылаушылардың тізімі жасалуда. Олар 26 сәуір күні сайлау
учаскелерінде жұмыс жасайды.
Өз тұғырнамасын кандидат Сыздықов Ақмола облысы жұртшылығына да таныстырды.
Тұрғын Сыздықов, Қазақстан Республикасы Президенттігіне кандидат:
Батыс мәдениеті - үлгі аларлық қағидат емес, өйткені батыстық құндылықтар,
шындығына келгенде, жалған. Менің ойымша, бейбітшілік, адамгершілік,
интернационализм адамзаттың бүгінгі даму кезеңіндегі басты құндылықтарға
айналып келеді.
Тұрғын Сыздықов отбасылық құндылықтарды бағалауға, ата дәстүрді қастерлеуге
үндейді. Және рухани құндылықты сақтап қалып, үлкенге құрмет, кішіге ізет
көрсетуге шақырады. Үгіт-насихат тобы халықты кандидаттың сайлауалды
тұғырнамасымен тереңірек таныстыруда.
Мөлдір БАҚЫТ-ҚЫЗЫ
