Қуғын-сүргін құрбандары жайлы
толық ақпаратты қамтитын «Мемориал»
веб-порталы құрылды. Жаңа сервис Ішкі істер министрлігінің сайтынан ашылған.
Мұрағаттар базасында қуғын-сүргін көрген жандар, сондай-ақ екінші дүниежүзілік
соғыс кезінде тұтқынға түскен кеңес жауынгерлері жайында ақпарат жинақталған.
Қазірдің өзінде веб-порталға 109 мың адамның мәліметтері енгізіліпті.
"Мұрағат тарихты жандандыруға септігін
тигізеді", - дейді Ішкі істер органдарының өкілдері. Тек өткен жылдың өзінде
қуғын-сүргінге ұшыраған адамдардың туыстарынан, ғалымдар мен
зерттеушілерден, сондай-ақ қоғамдық ұйымдардан 555 өтініш түсіпті. Олардың 400-ден астамы Қазақстан азаматтарынан. Тағы
100-ден астамы ТМД елдері мен алыс шет
мемлекеттерден келген.
Рауза Әлжанова, ҚР ІІМ арнайы
мемлекеттік мұрағатының аға инспекторы:
Біздің «Мемориал» сервисінде
қуғын-сүргінге ұшырап, бұрынғы Кеңес үкіметінің 58-59-шы баптары бойынша
контрреволюциялық, мемлекеттік қылмыстары үшін сотталған, артынан сот
органдарыменен ақталған адамдардың қылмыстық істері бойынша біз ақпарат
береміз. Және де ол веб-порталда толық ақпарат бар.
Ләйлә ҚАЗИАҚПАРОВА
