Екі күн бойында Каспий
жағалауында «Ақтау-Антитеррор-2015» республикалық жедел-тактикалық
оқу-жаттығулары өтті. Сценариге сәйкес, Ұлттық қауіпсіздік қызметінің арнаулы
бөлімшесі қызметкерлері ланкестер басып алған кемеде және университет
ғимаратында арнайы операция өткізіп, көлік пен нысанды азат етті. Оқу-жаттығу
жұмыстарына 3 мыңнан астам қызметкер атсалысты. Олар ланкестік қауіпсіздік
деңгейін белгілеу механизмі мен төнген қауіп жайлы бұқараны ақпараттандыру
барысын негізге алды.
Нұртай Әбіқаев, ҚР ҰҚК төрағасы:
Біз алғаш рет, екі бөлек
штабтың қызметін біріктірдік. Бұл антитеррорлық орталық пен қарапайым тұрғындар
арасында табиғи апатқа қарсы қауіпсіздікті қамту штабы. Бұқараны ақпараттандыру
мәселесі өзекті. Оны да жан-жақты қарастырдық. Біздің басты мақсатымыз - елдік
барлық органдарын жұмылдыру болды. Меніңше, бұл міндетті орындадық.
Оқу-жаттығу шаралары әскери
полигонда басталып, Ақтау теңіз портында жалғасты. Мұндағы сценарийге сәйкес,
ланкестер кемені басып алып, экипажды тұтқынға алады. Сондай-ақ, портта тағы
бір төтенше жағдай болған: мұнай танкері отқа оранды. Арнаулы жасақ пен өрт
сөндірушілер алға қойылған міндетті бұлжытпай орындап, жергілікті білім
ордасындағыларды террористерден «құтқарып қалды». Ал, лаңкестердің көзі
жойылды.
Әсем МҰХИТОВА
