Бүгін
халықаралық балаларды қорғау күні. Жаздың алғашқы күні Астанада түрлі мерекелік
шаралар өтуде. Солардың бірі «Балалықтың бойтұмары» атты ойын-сауық
бағдарламасы. Конгресс Холл сарайында өткен шараны Астана қаласының әкімдігі,
қалалық Білім басқармасының қолдауымен Оқушылар сарайының қызметкерлері
ұйымдастырды. Концертке
барлығы 700-ден астам бүлдіршін қатысты. Оқушылар сарайының түрлі үйірмелеріне
қатысып жүрген балалар, оқып-үйренгендерін көрермен назарына ұсынды. Өнер,
білім, ғылым, сурет, вокал, спорт, дизайн, би, робот техникасы салаларын жетік
меңгергендерін аңғарта білді. Сондай-ақ, мерекелік шара барысында қолөнер
бұйымдарының көрмесі де өткізілді. Мұнда жас ғалымдардың қолынан шыққан әтір
мен бальзамдар, қылқалам туындылары қойылған.
Эльмира
Суханбердиева, Астана
қаласы Білім
басқармасының басшысы:
Бүгінгі
концерттің біз үшін маңызы зор. Өйткені қаламыздың бүлдіршіндері, оқушылар
сарайының тәрбиеленушілер 3 жыл ішінде үйренген өнерлерін паш етіп отыр. Қорытынды
кеш десек те болады. Көрермендердің қатарында көбінесе ата-аналар бар.
Сондай-ақ, білім министрлігінің өкілдері, қосымша білім беру саласының
қызметкерлері де бар. Бүгін біз еңбегіміздің жемісін көріп отырмыз.
Бекзат
Қадырбеков, Вокалды
ансамбль мүшесі:
Бір
де бір рет жаңылыспай, жақсы өнер көрсете білдік. Сондықтан көңіл күйіміз
тамаша!
Бронислав
Буганис, Оқушылар сарайының «Ерте музыкалық дамыту» үйірмесінің жетекшісі:
Мен
тәрбиеленушілеріммен бірге сахнаға шықтым. Олардың жас шамалары 4 пен 6 жас
арасында. Балақайлармен бірге мен де өзімді сергек сезінемін. 2 маусым күні мен
50 толамын, бірақ өзімді әлдеқайда жас сезінемін.
Ләйлә ҚАЗИАҚПАРОВА
