Теннистен «Ролан Гаррос» турнирінің 9 дүркін жеңімпазы Рафаэль Надаль
жартылай финал жолдамасынан құр қалды. Ширек финалда Сербия спортшысы Новак
Джоковичпен кортқа шыққан Испания теннисшісі қатарынан үш сетте ұтылды.
Тақырыпты Самат Қанағатов тарқатады.
Новак Джоковичтің жартылай финалдағы қарсыласы шотландиялық Энди Маррей мен
испания спортшысы Давид Ферер кездесуінде анықталды. Әлем рейтингінде 3-ші
сатыда тұрған Маррей бірінші сетте испаниялық тарапынан қарсылыққа тап болды.
Негізгі уақытта бірін-бірі ала алмаған спортшылар бірінші сет жеңімпазын
тай-брейкте анықтады. Бұл сында қарсыласына қарағанда алаңда ширақ қимылдаған
Шотландия теннисшісі 7-4 есебімен басым түсті. Бұл жетістігінен кейін
шабыттанған Энди Маррей үзілістен кейін де алған бетінен қайтпай, ұпай санын
арттырды. Өз кезегінде жиі қателесіп, қарсыласының мықты соққыларын қайтара
алмаған Давид Ферер бұл сетте 6-2 есебімен есе жіберді. Дегенмен, намысқа
тырысқан Пиреней Түбегінің өкілі үшінші сетте табандылықтың арқасында 7-5
есебімен үздік шығып, есепті қысқартты. Бірақ Испания спортшысының қуанышы
көпке созылмады. Қалған уақытта тез жиналған шотландия спортшысы қарсыласының
бас көтеруіне мүмкіндік бермей, кездесудің жеңімпазы атанды. Енді жартылай
финалда әлемнің бірінші ракеткасы Новак Джоковичпен кортқа шығатын Маррейді тартысты
жекпе-жек күтіп тұр.
Ұлттық хоккей лигасында «Стенли» кубогы жолындағы финалдық жекпе-жек
басталды. Ақтық сынға жолдама алған «Тампа бей» және «Чикаго» командалары енді
бас жүлдені сарапқа салады. Екі команда арасындағы алғашқы жекпе-жек «Тампа» айдынында
өтті. Сондықтан болар өз жанкүйерлерінің алдында намысқа тырысқан алаң иелері
бірінші болып есеп ашты. Голдың авторы - Александр Киллорн. Бірақ, «Тампа Бей»
хоккейшілерінің қуанышы көпке созылмады. Қарымта шабуылға шыққан қонақтар
небәрі 2 минуттың ішінде айдын иелерінің қақпасына қатарынан екі шайба соқты.
Алдымен Теуво Теравяйнен есепті теңестірсе, келесі сәтте Антуан Вермет
мергендігімен танылып, командасына жеңіс сыйлады. Қорытынды есеп - 2-1 «Чикаго»
клубының пайдасына.
Самат ҚАНАҒАТОВ
