Бүгін барша
қазақстандықтар Астана күнін атап өтуде. Елорда биыл 17 жылдығын тойлап жатыр.
Астана күнінің басты ұраны - «Ел жүрегі - Астана!». Бұл күні түрлі
мәдени-бұқаралық шаралар, фестивальдер өтеді. Астана күні дәстүрлі түрде
мерекелік отшашумен аяқталады, оны қаланың бірнеше жерінен - атап айтқанда,
Есіл өзені жағасынан, «Хан Шатыр» сауда ойын-сауық орталығы мен Абылай хан және Пушкин көшелері
қиылысындағы гүлзардан көруге болады. Сондай-ақ Астана күніне арналған
мерекелік шаралар Қазақстанның барлық аймақтарында өтеді. Еске салайық, Елорданы
Алматыдан Ақмолаға көшіру туралы шешім 1994 жылғы 6 шілдеде қабылданды. Елорда 1997 жылғы 10 желтоқсанда
көшірілді. Президенттің 1998 жылғы 6 мамырдағы Жарлығымен Ақмола атауы Астана
болып өзгертілді. Жаңа астананың халықаралық тұсаукесері сол жылы 10-маусымда
өтті. Елорда үні 2009 жылдан бері жыл сайын 6 шілдеде мемлекеттік деңгейде аталып жүр.
Базаргүл ОТЫНШИЕВА
