Елорда қар құрсауынан шыға алар емес. Қажетті техника жеткілікті бола тұра, жауаптылар қаланы қардан толық тазарта алмай әлек. Қозғалыс қиындап, шаһар тұрғындары жұмыстарына жете алмай қиналған. Тіпті толастамай жауған қардан 150-ден астам жол көлік оқиғасы тіркеліпті. Синоптиктер бір күнде түскен ұлпа қардың қалыңдығы айлық нормадан асып кеткенін айтады.
Ғалымжан ӨТЕМІСОВ, ТІЛШІ:
Нұр-Сұлтанға көктем кеш келеді. Демалыс күндері жауған ұлпа қар қала жұртын әбігерге салып қойды. Тіпті қардың қалыңдығынан шаһардағы 4 полигонда жұмыс бәсеңдер емес. Мәселен, бір ғана Сарыарқа ауданы бойынша қардан тазарту жұмыстарына 130-дан астам техника жұмылдырылыпты.
Қардың басына қар алар. Бірақ, бас қалада күні бойы жауып, бораған боран арқаны кеңге салуға әлі ерте екенін аңғартты. Маңызды жолдар жабылып, тіпті қала ішіндегі тіршілік қиындады. Жұрт көшеге шыға алмай қалды. Жол сақшылары жол апатының да күрт өскенін хабарлады.
Жеңіл көліктер тұрмақ, қоғамдық көліктердің де қозғалысы қиындады. Ал қала мыңана қатынайтын 18 маршрут бірнеше сағат бойы қозғала алмаған. Жолаушылар мен қала тұрғындары тазалыққа жауаптылардың салғырттығын сынады.
БЛИЦ:
- Олар тазалап жатыр, кінәсі жоқ. Бірақ, бәрібір үлгеріп жатқан жоқ ғой.
- Жүріп-тұру расымен қиын. Көріп тұрсыздар ғой көктем келсе де, қар деген тізеден келеді. Біз сияқты зейнеткерлерге тіптен қиын.
- Үй жақтың бәрі қар. Жел ұрып тастаған.
Қала тұрғындары күрек алып, қарды өздері тазартуға мәжбүр. Өйткені аулалардан көліктерін шығара алмай қалды. Ал жауаптылар көше бойын тазартып үлгермей жатқандарын айтып ақталды. Жолда кептеліс болмас үшін алдымен қозғалысы көп көшелерді тазартқандарын жеткізді.
Руслан ЖҮСІПОВ , "АСТАНА ТАЗАЛЫҚ" ЖШС БАС ДИРЕКТОРЫНЫҢ ОРЫНБАСАРЫ:
Қар толассыз жауғандықтан біраз қиындықтар орын алды. Сондықтан кейбір көшелерде үлгермей қалған кездер болды. Бірақ, қазір жағдайды ретке келтіріп жатырмыз.
Астана тазалық көше тазалығына екі мыңнан астам жұмысшы жұмылдырдық деп отыр. Арнайы техника да жеткілікті деді. Аулалар мен көшелердегі қалың қар ерісе су басу қаупі де жоқ емес.
Азамат НҰРТАЕВ , "САРЫАРҚА" АУДАНЫ ҚАР ПОЛИГОНЫНЫҢ ЖЕТЕКШІСІ:
Бұл полигондар еріген суды жинау үшін арнайы жасалған. Яғни, су тасқыны болмайды деп сеніммен айта аламын. Барлығы біздің жіті бақылауымызда.
Айта кетейік, коммуналдық қызмет басшылары алдағы демалыс күндері қаланы қардан тазарту жұмыстарын аяқтайтындарын айтты. Алайда, ережеге сәйкес бұл жұмыстар жауын-шашыннан кейін үш күн ішінде реттелуі тиіс еді.
Ғ. Өтемісов
