Ақтаудағы дәмханада болған жарылысқа кім кінәлі? Қазір мамандар оқиға орнында тексеру жұмыстарын жүргізіп жатыр. Алдын ала мәлімет бойынша, зардап шеккендер мен қайтыс болғандар жоқ. Егер апатқа айыпты адам анықталса, ол үш жылға дейін бас бостандығынан айырылуы мүмкін. Бір түнде күл- талқаны шыққан "Шерқала" кешенінің үйінділерін тазарту жұмыстары аяқталуға жақын. Дегенмен, құзырлылар әлі де қауіптің барын айтады. Толығырақ әріптесім Асылбек Даниярдың материалында.
Асылбек ДАНИЯР, ТІЛШІ:
Төтенше жағдай кеше түнде болған. Жарылыстың күшті болғаны соншалық екі қабатты ғимараттың дымы қалмады. Нысанның қасында орналасқан көлік жөндеу орталығына да әжептәуір зақым келген. Жалпы, 200 шаршы метр аумақ қираған.
Әлеуметтік желіде жалған ақпарат тарап, халық арасында дүрбелең туғызды. Хабарламада 16 адамның мерт болып, 20-дан астам келушінің жарақат алғаны жазылған. Мұны ресми орган жоққа шығарды. Бірақ ғимараттың қасында жұмыс істейтіндердің айтуынша, дәмхана кешкі 6-ға дейін жұмыс істегенімен, қызметкерлер оқиға орнында болуы мүмкін.
Болат ҚЫСТАУБАЕВ, КӘСІПКЕР:
Біз күнделікті сол жерден тамақтанып жүретінбіз. Газ өзінен -өзі ешқашан білесіздер ғой. Өйткені, дүйсенбіге қарай тамақ дайындау керек. Түнделетіп істейді, үлгермейді ғой өйткені.
Жауаптылардың айтуынша, ешкім ауруханаға бармаған, дәрігер көмегіне жүгінбеген. Мейрамхана егесі де жарылыс кезінде ол жерде ешкім болмағанын айтады.
Абай ӘМІРЕЕВ, МЕЙРАМХАНА ИЕСІ:
Адамым қалған жоқ. Мен отбасыммен бірге, бала-шағамменен алып шығып кеткенмін сағат 19:30-дың шамасында. Өзім жауып, құлыптап кеткенмін. Тігін цехы бар оларға мен жауап бере алмаймын.
Мейірбек ҚАРАЕВ, МАҢҒЫСТАУ о. ТЖД ӨРТ СӨНДІРУ ЖӘНЕ АВАРИЯЛЫҚ ҚҰТҚАРУ ЖҰМЫСТАРЫ ММ БАСШЫСЫ:
Төтенше жағдайлар департаментінен 11 техника және 70 жеке құрам жұмыс жасауда қазіргі таңда. Құлаған ғимаратты тазалап 100 пайызға бітіргеннен кейін қосымша ақпарат береміз.
Дүмпудің күшті болғаны соншалық ғимараттың алдына төселген асфальт опырылып қалған. Жарылыс салдарынан 11 көлікке зақым келген. Полицейлер қазір олардың иелерін анықтап жатыр. Ал апатқа байланысты өрт қауіпсіздігі талаптарын бұзу бабы бойынша қылмыстық іс қозғалған.
Азамат СЕЙТАЛИН, МАҢҒЫСТАУ о. ТЖД МЕМЛЕКЕТТІК ӨРТ БАҚЫЛАУ БАСҚАРМАСЫ БАСШЫСЫНЫҢ ОРЫНБАСАРЫ:
Сауда үйінің иесінен алдын ала жүргізілген сауалнама бойынша, осы жерде болуы мүмкін газ баллондарының саны анықталды. Біздің қызметкерлер екі газ баллонын алып шықты, тағы екі газ баллоны үйінді астында қалуы мүмкін. Жарылыс болу қаупі әлі де бар.
Төтенше жағдай министрілігі апат себебіне қатысты екі нұсқа ұсынып отыр. Бірі - электр сымдарының қысқа тұйықталуы, екіншісі - газ баллонының жарылуы. Қылмыстық сипаттағы нұсқа алынып тасталуы мүмкін. Облыста шұғыл жедел штаб құрылып, мамандармен тиісті жұмыстар жүргізілуде.
А. Данияр
