Мемлекет басшысы Қасым-Жомарт Тоқаев «Орталық Азия – Үндістан» саммитіне қатысты. Алқалы жиын онлайн форматта өтті. Көшбасшылар Орталық Азия елдері мен Үндістан арасындағы түрлі салалар бойынша ынтымақтастықты нығайтудың және кеңейтудің перспективаларын талқылады. Қасым-Жомарт Тоқаев Үндістан мен Орталық Азия елдеріне өңіраралық көлік-логистикалық консорциум құруды ұсынды. Сондай-ақ, Мемлекет басшысы әлемдік тренд немесе үрдіс экономиканы цифрландыру болып қала беретінін айтты. Жасанды интеллект, интернет-заттар, онлайн-коммерция және киберқауіпсіздік сияқты салаларды дамыту сұранысқа ие болып отыр деді ол. Осы орайда өзара тиімді ынтымақтастық үшін елге үндістандық компанияларды шақырды. Сонымен қатар, Тоқаев Әлемде негізгі азық-түлік бағасының тұрақты түрде өсу тенденциясы байқалатынын сөз етті. Осы ретте ол Үндістан мен Орталық Азия басшыларына ауыл шаруашылығы министрлерінің кеңесін өткізуді ұсынды.
Қасым-Жомарт ТОҚАЕВ, ҚАЗАҚСТАН РЕСПУБЛИКАСЫНЫҢ ПРЕЗИДЕНТІ:
Соңғы уақытта мұндай факторлардың агросекторға қысымы айтарлықтай байқалды. Сондықтан біздің диалогымыздың аясында агротехнологиялық және ғылыми-инновациялық өзара іс-қимылды нығайту жөніндегі іс-шаралар әзірлеу жақсы болар еді. Ауыл шаруашылығы министрлерінің тұрақты кеңесін өткізу де пайдалы болмақ.
Қазақстан Президенті Үндістанның сауда-экономикалық платформасын құру бастамасын қолдады. Еліміз Үндістан экспортын кеңейту мүмкіндігін қарауға дайын екенін айтты. Мұнан өзге Қазақстан тау-кен металлургия кешені, ауыл шаруашылығы, жасыл энергетика, денсаулық сақтау, фармацевтика секторы сынды келешегі бар салалар инвестиция тартуға мүдделі деді. Президенттің айтуынша, Үндістан мен Орталық Азия елдері арасында тауар айналымы 3 млрд долларға жеткен. Бұл ретте сауда-саттықтағы Қазақстанның негізгі үлесі 80 пайыз.
Д. Жарқынбек
