Хабарымыз әрі қарай спорт жаңалықтарымен жалғасады. Онымен әріптесім Асылбек Данияр таныстырады. Асылбек, бүгін қандай ақпараттармен бөлісесің?
Кеш жарық! Қазақстан футбол федерациясыа жаңа президент сайланды. Сондай-ақ София қаласындағы дәстүрлі бокс турнирі аяқталды. Осы және өзге де ақпараттарды сәлден соң тарқатып айтамын.
Болгария астанасындағы әуесқой бокстан 72-ші «Странджа кубогі» халықаралық турнирі аяқталды. Қазақстан құрамасы бос қайтқан жоқ. Қоржында жүлденің барлық түрі бар. Былғары қолғап шеберлері жалпы 17 медаль ұтты. Командалық есеппен кестенің үшінші сатысынан көрінді. Бірінші - Өзбекстан, екінші орында-Ресей. Спортшыларымыздың төртеуі бас жүлдеге ие болды. Тағы төртеуі күміс медаль еншіледі. Ал 9-ы қоланы қанағат тұтты. 50 келіге дейінгі салмақ дәрежесіндегі финалда Назым Қызайбай Алжирден келген қарсыласын үшінші раундта нокдаунға түсіріп, айқын басымдықпен жеңіске жетті. 54 келіде өнер көрсеткен Махмұт Сабырхан болса, жекпе-жекке шықпай-ақ алтын иеленді. Оның болгариялық қарсыласы жарақатына байланысты шаршы алаңға шығудан бас тартқан. 86 келіге дейінгі салмақта шаршы алаңға шыққан Серік Тоғамбаев украиналық боксшыны 5:0 есебімен тізе бүктірді. Әйелдер арасында 70 келі салмақта отандасымыз Валентина Хальзова топ жарды. Айта кетейік, Софиядағы бұл турнирде 36 елдің 450 спортшысы бақ сынады.
Баскетболдан Қазақстан ерлер құрамасы Бахрейнге қарсы алғашқы кездесуін өткізді. Әлем чемпионатына іріктеу кезеңі отандастарымыз үшін сәтті болды. Бұл ойында қазақстандық баскетболшылар 95:48 есебімен жеңіске жетті. Алда әлі бірнеше ойын бар. Жалпы, финалдық кезеңге жолдама алу үшін үздік 32 елдің қатарына ену керек.
17 қыркүйекте қазақстандық кәсіпқой боксшы Геннадий Головкин мен мексикалық Сауль Альварес арасындағы үшінші жекпе-жек өтеді.
Vesti.kz. ақпараттық-спорт порталының хабарлауынша, екі былғары қолғап шебері де ресми келісімшартқа қол қойды. Дегенмен, олар бұған дейінгі жоспарланған кездесулерінде жеңуі керек. Мексикалық пен ресейлік боксшы 7 мамырда рингте қолғап түйістіреді. Ал Головкин мен Мурата сәуір айында Жапонияда кездесуі тиіс.
Қазақстан футбол федерациясының президенті болып Әділет Бәрменқұлов сайланды. Дауыс беру қорытындысы бойынша ол– 14 дауыс жинаған. Жалпы бұл процеске – 26 адам қатысқан.
Менде бүгінге осы. Назар аударып тыңдағандарыңызға рақмет! Елдегі және әлемдегі спорттың басты оқиғаларын бірінші болып бізден біліңіздер. Амина, сөз сенде.
Рақмет, Асылбек! Ал, біз жаңалықтарымызды жалғастырамыз.
А. Данияр
