Кезек, әдеттегідей спорт жаңалықтарында. Онымен әріптесім Асылбек Данияр таныстырады. Асылбек, спорт әлемінде қандай жаңалықтар бар?
Кеш жарық! Атақты спортшы Конор Макгрегор әлемдегі ең танымал футбол клубын сатып алуға дайын екенін мәлімдеді. Осы және өзге де ақпараттар сәлден соң.
Бокстан жастар арасындағы Азия чемпионатының алғашқы жекпе-жегінде үш қазақстандық боксшы қарсыластарын нокаутқа түсірді. Иорданияда өтіп жатқан турнирдің екінші жарыс күні рингте алты боксшымыз ел намысын қорғады. Оның бесеуі келесі кезеңге жолдама алды. 57 келіге дейін салмақта Бахтияр Анарбаев бірінші раунда тәжік боксшысын сұлатып түсірді. Жеңісті жолды командаласы, 60 келіге дейінгі салмақта бақ сынаған Акбар Бисарев жалғастырды. Ол моңғол боксшысын екінші раунда ойыннан шығарып жіберді. Мерзімінен бұрын жеңіске жеткен тағы бір былғары қолғап шебері -Ислам Советов.
Ташкентте семсерлесуден жасөспірімдер мен кадеттер арасындағы Азия біріншілігі аяқталды. Додада Қазақстан командасының спортшылары үш алтын, үш күміс және жеті қола медаль жеңіп алды. Жалпы командалық есепте Гонконг пен Өзбекстаннан кейінгі үшінші орынға табан тіреді. Турнирге әлемнің 20 мемлекетінен 300-ден аса спортшы қатысты.
Дэвис кубогіндегі Қазақстан құрамасының қарсыластары белгілі болды. Теннисшілеріміз іріктеу кезеңінде Норвегия құрамасымен кездеседі. Ойын елорда уақытымен 23:00-де басталады. Ұлттық құрама капитаны бұл матчта жеңіске жететіндеріне сенімді.
Конор Макгрегор «Челси» футбол клубын сатып алуға ниетті екенін мәлімдеді. Бұл туралы спортшы твиттердегі парақшасында жазды. Ол «Челсиді» илену үшін 3 миллиард фунт төлеуге дайын екенін айтқан.
Дзюдодан "Grand Slam" турнирі екі айға кейінге шегерілді. Әлемде қалыптасқан жағдайға байланысты Халықаралық дзюдо федерациясы мен турнир ұйымдастырушылары осындай шешім қабылдады. Спорттық шараны 3-5 маусымда өткізу жоспарланып отыр.
Менде бүгінге осы. Елдегі және әлемдегі спорттың басты оқиғаларын бірінші болып бізден біліңіздер. Амина, сөз сенде.
Рақмет, Асылбек! Ал, біз жаңалықтарымызды жалғастырамыз.
А. Данияр
