Түркістан облысында ең ауыр салмақтағы қой анықталды. «Миллион» атты қошқар бірінші орынға ие болып, оның иесі 10 мың АҚШ долларын жеңіп алды.
Ең ауыр қошқардың бойы -1 метр 5 см. Сарыағаштық Қуаныш Мықтыбаев бұл түлікті кезінде Қырғызстаннан 30 мың долларға сатып алыпты. Ал шымкенттік шаруа Бахтияр Бабажанов салмағы 193 келі болатын «Крокодил» атты қошқарымен екінші орын иемденді. Оған 500 мың теңге сыйақы берілді.
Байқауда қой-қошқарлар салмағы, кеуде өлшемі, сыртқы көрінісі, бойы мен түсі бойынша іріктелді. Сұлулығы жағынан былтыр аймақта 40 мың долларға саудаланған «Каштан» атты қой жеңімпаз деп танылды. Ауыл шаруашылығы министрлігі ұйытқы болған шараға Ресей, Молдова, Өзбекстан, Қырғызстан, Тәжікстан елдерінің қой өсіруші қоғамдық бірлестіктерінің өкілдері де қатысты.
А. Төребекқызы
