Кезек, әдеттегідей спорт жаңалықтарында. Онымен әріптесім Асылбек Данияр таныстырады. Асылбек, бүгін қандай қызықты ақпараттармен бөліесің?
Армысыз, көрермен! Кеш жарық, Лаура! Геннадий Головкин жекпе-жек алдында қазақстандықтарға мемлекеттік тілде мәлімдеме жасады. Осы және өзге де жаңалықтар сәлден соң.
Көптен күткен кәсіпқой бокс кеші. Ертең қазақстандық Геннадий Головкин мен жапониялық Риота Мурата шаршы алаңда кездеседі. Олар IBF, IBO және WBA Super чемпиондық белбеулері сарапқа салмақ. Бүгін былғары қолғап шеберлері жекпе-жек алдында салмақ өлшеді. Қорытындысы бойынша екі боксшы да санат шегін орындап, таразыда 72,5 келіне көрсетті.
Сонымен бірге, бүгін Головкиннің туған күні. 40 жасқа толған әлемге әйгілі боксшыны ринг иелері де ұмытпапты. Салмақ өлшеу рәсімі аяқтала сала жапониялықтар қазақстандық спортшыны құттықтап, құрмет көрсетті.
Мемлекет басшысы Қасым-Жомарт Тоқаев та кәсіпқой боксшы, әлем чемпионы Геннадий Головкинді туған күнімен құттықтап, жеделхат жолдады. Президент спортшының шаршы алаңда ертең өтетін кезекті жекпе-жегінде жеңіске жетуіне тілектестік білдірді. Сайтамадағы бокс кеші ертең елорда уақытымен 15:00-де басталады. Головкин мен Муратаның басты жекпе-жегі шамамен сағат 18:10-ға жоспарланған.
Таиландта өтіп жатқан бокстан халықаралық турнирде қазақстандық боксшы қарсыласын бір жұдырықпен есінен тандырып тастады. 69 келіге дейінгі салмақта шаршы алаңға шыққан Асыланбек Шымбергенов ринг қожайынын 2 раунда нокаутпен ұтты. Отандасымыздың жұдырығы қатты болғаны соншалық 1 минуттай талып жатты. Осылайша, Шымбергенов финалға жолдама алды. 57 келіде Серік Теміржанов та шешуші кезеңге өтті. Ол да жергілікті спортшымен жекпе-жекке шығып, 3:2 есебімен жеңіске жетті. Осыған дейін бұл жарыста төрт қазақстандықтың бір-бірімен жұдырықтасатынын айтқан едік. 91 келіде Сағындық Тоғамбай мен Айбек Оралбай, 63 келіге дейінгі салмақта Санатәлі Төлтаев - Сұлтан Мусинов кездесті. Кейінгі кезеңге Айбек Оралбай мен Сұлтан Мусинов. Ал, үндістандықпен бокстасқан Аятулла Тәкіжанов жеңіліп қалды. Бүгінгі жарыс күнінде ел қоржынына 3 қола медаль түсті. Ертең финалдық бәсеке.
"Баварияның" шабуылшысы Роберт Левандовский мансабын каталондық "Барселонада" жалғастыруы мүмкін. Бұл туралы Vesti.kz ақпараттық-спорт порталы хабарлады. Қазір футболшы мен тараптар арасында келіссөздердің жүріп жатқанын жазған. Левандовскийдің өзі Испанияға қоныс аударуға қарсы емес, дейді.
Менде бүгінге осы. Елдегі және әлемдегі спорттың басты оқиғаларын бірінші болып бізден біліңіздер. Лаура, сөз сенде.
Рақмет, Асылбек! Ал, біз жаңалықтарымызды жалғастырамыз.
А. Данияр
