Солтүстік Қазақстанның тұрғындары референдумда жоғары белсенділік танытып жатыр. Теріскейліктер таңмен таласа жаппай дауыс беруге ағылуда. Осы уақытқа дейін тұрғындардың жартысына жуығы өз таңдауын жасады. Солтүстіктегі тілшіміз Абзал Құрманкин қазір тікелей эфирге шығады. Абзал, сөз сенде.
Абзал ҚҰРМАНКИН, ТІЛШІ:
Иә Әділет, теріскейліктер өте белсенді. Жұрт жаппай таңсәріден бастап бала-шағасын ертіп келіп, өз таңдауын жасап жатыр. Орталық сайлау комиссиясы жариялаған ақпаратқа сәйкес, Солтүстік Қазақстан облысы дауыс беру бойынша елімізде алғашқы орында келеді. Осы уақытқа дейін тұрғындардың 58 пайыздан астамы референдумға қатысып үлгерген. Олардың арасында спортшы Фархат Қыстаубаев та бар. Жеңіл атлет бір ай бұрын Бразилияда өткен сурдлимпиядаға қатысып, декатлон бойынша Қазақстанға тарихта алғаш рет алтын медаль алған болатын.
Фархад ҚЫСТАУБАЕВ, СУРДОЛИМПИАДА ЧЕМПИОНЫ:
Президентіміз айтқандай, қазір тұрғындар үшін Жаңа Қазақстанды қалыптастыруға зор мүмкіндік туып тұр. Біздің пікіріміздің ескеріліп жатқаны өте жақсы. Мен бұл маңызды науқаннан шет қалмау керек деп шештім. Елдің болашағы үшін мен өз таңдауымды жасадым.
Абзал ҚҰРМАНКИН, ТІЛШІ:
Жалпы, Қызылжар өңірінде 379 мың адам дауыс беруге құқылы. Аймақта 648 референдум учаскесі бар. Оның 12сі әскери және медициналық мекемелер сияқты жабық нысандарда орналасқан. Әділет, мендегі бар ақпарат әзірге осы.
А. Құрманкин
