Референдумға дауыс беру ел аумағы бойынша аяқталды. Ал, шет мемлекеттердегі референдум учаскелері, сағат айырмашылықтарына байланысты әлі жұмысын жалғастырып жатыр. Орталық сайлау комиссиясы алғашқы нәтижелерін жариялауға дайындық үстінде. Тілшіміз Мерей Базарұлы да, қазір соңғы ақпараттармен бөлісуге әзір тұр екен. Мерей, эфирдесің.
Мерей БАЗАРҰЛЫ, ТІЛШІ:
Ел аумағындағы 10 мыңға жуық учаскенің есігі жабылып, тіпті батыстағы дауыс беру тоқтатылды. Қазір бюллетендерді санау жүріп жатыр. Орталық референдум комиссиясының кешкі 8-дегі ақпараты бойынша саяси науқанға 8 млнға жуық қазақстандық қатысып, өз таңдауын жасады. Бұл жалпы дауыс беруге құқы бар 12 млн-дай азаматтың 67 проценті. Өңірлер бойынша белсенділік кестесінің көш басында Түркістан тұр. Одан кейін Шығыс Қазақстан, Қарағанды, Жамбыл облыстары бар. Сыртқы Істер министрлігінің мәліметіне сәйкес, шетелдерде 5 мыңнан астам отандасымыз дауыс беріп үлгерді. Бұл - тізімге енгізілген сайлаушылар санының 45 пайызы. Уақыт айырмашылығына байланысты кей елдерде учаскелер жабылса, ал бірқатар елде енді ғана ашылып жатыр. Америка құрама штаттары, Канада мен Бразилия елдерінде қазақстандықтар таңдауларын біздің уақытпен таңға дейін жасай алады. Ал қазір Орталық референдум комиссиясының хатшысы Мұхтар Ерман соңғы мәліметтерді жариялап жатыр. Назар аударайық.
