Шымкентте мектепке дейінгі мекеме меңгерушілері бюджеттің 45 миллион теңгеден астам қаражаттын қалтаға басқан. Қаладағы үш бірдей балабақша, пандемия кезінде бақшаға келмеген бала үшін мемлекеттен қаржы алып отырған. Экономкалық тергеп-тексеру департаментінің мәліметінше, қолды болған қомақты қаржы «Балапан» бағдарламасы бойынша 2019-2021 жылдар аралығында бөлінген қаражат. Жекеменшік балабақша басшылары бүлдіршіндердің келуінің электрондық табельдеріне жалған мәліметтер енгізу арқылы заңсыз иемденген.
Ербол ҚҰРМАНБАЕВ, ШЫМКЕНТ қ. БОЙЫНША ЭКОНОМИКАЛЫҚ ТЕРГЕП-ТЕКСЕРУ ДЕПАРТАМЕНТІНІҢ ТЕРГЕУШІСІ:
Жоқ баланы бар деп табельге енгізген ғой. Сол бойынша үш жыл аралығында мемлекеттік ақшаны жымқырған. Жалпы сома 45 млн боп тұр ғой үш жылға. Шын мәнінде ол уақыттарда балалар мүлдем бармаған ғой карантин боп? –Бармаған, иә. Жауап алынған кісілерден, ата-аналарынан.
Департаментің дерегінше, мемлекет қаржысын жымқырды деген күдікпен бес адам ұсталған. Оның бірі кепілмен жіберілген. Құзырлылар әзірге нақты қанша балаға артық ақы алынғанын айтпады. Ал білім басқармасының мәліметінше, күдіктілердің арасында балабақша құрылтайшысы да бар. Оның қарамағындағы мекеме біреу емес көрінеді. Бұл істе Шымкент қаласы бойынша білім басқармасы жәбірленуші тарап болып танылып отыр.
А. Төребекқызы
