Оқу құралдарының құны аспандап тұр. Осылай деген ата-аналар жыларман күйде. Қыркүйек қарсаңында саудасы қызған дүкендер, бағаны тіптен шарықтатып жіберген.
Таңмен таласа оқу құралдарын сатып алуға келген бұл келіншектің 3 баласы биыл мектепке барады. Кеңсе тауарларын сататын жәрмеңкеге келген ананың айтуынша, баға жаға ұстатады. Дәптер, қаламның құны соңғы аптада 10 процентке дейін көтерілген дейді.
НҰР-СҰЛТАН ҚАЛАСЫНЫҢ ТҰРҒЫНЫ:
35 теңге дейді дәптерлер. 100 мыңдай кетеді бір балаға. Еще жетпей қалады.
Мектеп жәрмеңкесінде оқуға қажетті құралдың барлығы бар. Сапасына қарай бағасы әртүрлі. 12 беттік бір дәптер – 25 теңге мен 40 теңге арасында саудаланып жатыр. Ал, қаламсап жинағын – кемінде 250 теңгеге табасыз. Оған 100 теңге тұратын сызғыш пен 500 теңгеге алатын сурет альбомын қосыңыз. 1800 теңгеден кем тұрмайтын күнделік те бар арасында. Бұл - елордадағы ең төменгі баға дейді тұрғындар.
БЛИЦ:
- Қала бойынша 40 теңгеден. Где-то 100 мың теңге кетеді ғой. Қазір бәрі қымбат.
- 20 мың теңге кететін шығар канцтовордың өзіне.
- Тетрадь бұл жерде арзан екен. Басқа жерде қымбат.
Оқу құралдарының қымбаттағанын сатушылар да мойындайды. Баға өсуіне байланысты келушілер де аз дейді.
Оралкүл ТОЙЛАНБАЙҚЫЗЫ, КӘСІПКЕР:
Өсім байқалады. Әсіресе, тетрадьтікі. Былтыр төмен еді, биыл көтерілді. Жұрттың алысы төмен. Енді 6 мың, 8 мың, 10 мың, әрі кетсе 20 мыңнан артық ешкім көтеріп алмайды.
Онлайн-дүкендердегі кеңсе тауарларының бағасында елеулі айырмашылық бар. Қаламсап жинағы – 500 теңгеден басталады. Түрлі түсті қарындаштар – 4000 теңгеге дейін барады. Сызғыш – 400 теңге тұрса, дәптер – 50 мен 100 теңге арасында сатылып жатыр. Қоғамдық саясат институты бір баланы мектепке дайындау үшін шамамен қанша қаражат кететінін есептеген. Құрал-жабдық, киім-кешегін, сөмкесін барлығын қосқанда - 83 мың 865 теңге қажет көрінеді. Ал елімізде 487 мыңнан астам отбасында 4 және онан көп бала бар. Әр балаға ай сайын 12 252 теңге ғана жәрдемақы төленеді.
А. Задабек
