Самара-Шымкент тас жолының Байқоңыр қаласы тұсында жол апаты болып, 5 адам қаза тапты. Оқиға түнгі 3 жарым шамасында болған. Аралдан Қызылордаға бағыт алған автобус пен «Тайота» маркалы автокөлік соқтығысқан. Соққының қатты болғаны сонша, жеңіл көлік жанып кеткен.
Ақылбек ӘМІРБЕКОВ, ҚАРМАҚШЫ АУДАНДЫҚ ПОЛИЦИЯ БАСҚАРМАСЫ БАСТЫҒЫНЫҢ МІНДЕТІН АТҚАРУШЫ:
«Тайотадан» 3 жолаушы, автобустан 2 жолаушы қайтыс болып, қайғылы жағдай орын алып отыр. Құрметті тұрғындар, автокөлік басқарғанда жылдамдықты асырмай, қарсы бағытқа шықпай, басып озу кезінде жолда жүру қағидаларын қатаң сақтауды сұраймыз.
Жантүршігерлік жол апатынан тағы 4 адам жарақат алған, олар Байқоңыр қаласындағы ауруханаға жеткізілді. Полиция департаментінің мәліметінше, апатқа кінәлі тұлғаны анықтау мақсатында арнайы сараптама тағайындалған. Қылмыстық кодекстің «автомобильді басқаратын адамның жол жүрісі қағидаларын бұзып, абайсызда 2 немесе одан да көп адамның өліміне әкеп соғу» дерегі бойынша іс қозғалды. Ресми ақпарат бойынша, Самара-Қызылорда тас жолы бойында жарты жылда 27 жол көлік оқиғасы болған. Салдарынан 22 адам көз жұмып, 43 адам жарақат алған.
М. Тоқтасынқызы
