5571 әскери бөлімінің сарбаздары ҚР Парламентінің Мәжілісі және Алматы қаласының мәслихат депутаттарын сайлауда өз таңдауын жасады, деп хабарлайды ҚазАқпарат.
5571-әскери бөлімінде орналасқан № 107 сайлау учаскесінде сап түзеген сарбаздар дауыс беруді таңғы сағат 06:00-де бастады.
«Бүгін ерекше күн. Себебі Қазақстан Республикасының азаматы ретінде дауыс беру құқығымды пайдаланып тұрмын»,- деді қатардағы жауынгер Ричард Зайенчковский. Қатысушылардың басым бөлігі алғаш рет дауыс беріп жатыр. Солардың бірі, 6 ай бұрын әскерге шақырылған Аман Ермахан. «Мен Астана қаласынан шақырылдым. Өмірімде бірінші рет дауыс бердім. Отанымыздың болашағына бей-жай қарай алмаймын. Сондықтан өз таңдауымды жасадым», - дейді сарбаз Аман Ермахан.
Әскери бөлімде сайлау өткізуге барлық жағдай жасалған. Сайлау жәшіктері мен 7 дауыс беруге арналған кабина бар. «Біздің сайлау учаскесінде дауыс беру таңғы сағат алтыда басталды. Біздің мақсат- Қазақстанның дамауына, өркендеуіне өз үлесімізді қосу.
«Алыптың қуаты халықта, халықтың қуаты бірлікте», демекші саяси науқанға үлкен жауапкершілікпен қатысып жатырмыз. Сарбаздардың көңіл күйі өте жақсы», - дейді 5571-әскери бөлімінің командирі Бақдаулет Оралұлы.
Алматы сайлау комиссиясының мәліметінше, мегаполистегі 7 әскери бөлімде дауыс беру сағат алтыда басталды.
