Павлодар облысындағы арнайы мектеп-интернатының тәрбиешілері ақыл-есінде кемістігі бар оқушыларды төбелестіріп қойып, қызықтап отырған. Бұл ата-ана шағымынан соң әшкереленді, деп хабарлайды Zakon.kz.
Жергілікті тұрғынның сөзінше, интернат тәрбиешілері тәртіпке бағынбаған оқушыларды ересектеріне ұрғызған. Ол жайында жәбір көрген қыз анасына айтып беріпті. Ал монитор арқылы қыздардың жаға жыртысқан сәтін тамашалағандардың арасында мекеме басшысы да бар көрінеді. Бұл туралы КТК телеарнасы хабарлаған.
Бірақ білім басқармасы бұл деректі теріске шығарды, тіпті оқушылардың не үшін төбелескенін де түсіндіре алмады. Қазір бұл іспен полиция айналысып жатыр.
"Білім басқармасымен қызмет тексерісі жүріп жатыр. Мектеп интернатының тәрбиешісі тәртіптік жазаға тартылды. Сонымен қатар аталмыш оқиға бойынша Тереңкөл ауданының полиция бөлімінде бұл жағдай тіркелді",-дейді Павлодар облысы білім басқармасының бас маманы Жібек Айтмұханбетова.
