Астанаға
басқа аймақтардан келген көлік жүргізушілері үш күннен соң ақы төлеуі мүмкін.
Бұл туралы қалалық мәслихаттың тоғызыншы сессиясында Елорда әкімінің орынбасары
айтты. Қосман Айтмұхаметов көшелердегі кептелісті көліктің көптігімен
түсіндірді. Қыркүйек айындағы мәліметті келтірді. Оның айтуынша, Астанада 343
мың автокөлік тіркелген. Тәулік сайын 70 мың көлік кіріп-шығады. 35 мыңдай
көлік тіркелмеген.
Қосман
Айтмұхаметов, Астана қаласы әкімінің орынбасары:
Мүмкін,
қалаға кіретін ондай көліктер үшін белгілі бір шектеулер енгіземіз. Мүмкін, үш
күн жүрсін, сосын Астанада жүргенің үшін төле дейміз. Дегенмен бұл норманы
өткізу қиын болады. Бұл норма басқа қаладан келетін және транзиттік көліктер
үшін қаралады. Сосын Елордаға кіреберістерді де ақылы қылу мәселесі қаралып
жатыр. Сағат 8 бен 10 аралығында. Қалаға енетін көліктердің негізгі легі
Қосшыдан, Талапкер, Қоянды, Жібек Жолынан келеді. Орынбор, Сығанақ көшелерінде
таңғы уақытта жүру қиын. Орынбор көшесінде 10 мектеп пен 9 балабақша бар. Әрбір
үшінші бала көлікпен жеткізіледі. Министрліктер үйіндегілердің бәрі машинамен
жүреді. Бұл - проблема.
Астана
әкімінің орынбасары шағын айналмалы жолдың құрылысы жайлы да баяндап өтті. Оның
жалпы ұзындығы 35 шақырымды құрайды. 2008 жылдан бері 22 км салынған. Тәулігіне
90 мың көлікті өткізіп, жол кептелісін азайтуға мүмкіндік бермек. 20 мыңдай
көлікті қала орталығына жеткізбей, айналдырып өткізе алады. 2017-2019 жылдарға
аталған жобаға 190 млрд теңге қосымша қаражаттың керегін алға тартты әкім
орынбасары. Бүгінде ЛРТ компаниясы жобасын ықшамдап, 89 млрд теңге үнемдеген.
Бұл қаржы да аталған жобаға жұмсалмақ.
Айгүл ӘДЕПБАЙ
