Павлодарда құлаған сауда үйінің шатыры 13 көлікті зақымдады, - деп хабарлайды Massaget.kz.
Әкімдіктің ресми мәліметі бойынша, қиранды аумағы 300 шаршы метр болады. Ал өңірлік ТЖД төтенше жағдай ошағына жақын жерде тұрған 13 автокөлік зақымданғанын хабарлады. Олардың кейбіреулері шатыр құрылымы астында қалып қойған.
"Құтқарушылар үйінді астындағы барлық көлікті тексеріп, арнайы гидравликалық құтқару құралдарының көмегімен 1975 жылы туған ер адамды шығарып алды", - деп хабарлады ведомство.
Бұған дейін жәбірленушіге травматикалық шок және екі аяғының сынуы диагнозы қойылғаны хабарланған болатын. 1971 жылы туған тағы бір жәбірленуші құтқарушылар жеткенше жедел жәрдеммен ауруханаға жатқызылған. Ер адамның миы шайқалған, жабық бассүйек-ми жарақаты алған.
Еске салайық, Павлодардағы сауда үйінің шатыры опырылғаны туралы хабарлама 7 шілдеде түстен кейін түскен болатын. Оқиға орнында Павлодар облысы Төтенше жағдайлар департаменті жедел-құтқару жасағының сегіз құтқарушысы мен екі техникасы, Апаттар медицинасы орталығының қызметкерлері, сондай-ақ екі жедел жәрдем бригадасы мен полиция қызметкерлері барғаны айтылды.
