19 жылға созылған үзілістен кейін Медеу мұз айдынында көптен күткен "Азия Дауысы" халықаралық музыка фестивалі қайта өтіп жатыр. 29 шілдеде шараның басты хедлайнері - Black Eyed Peas тобы көрермендер алдында өнер көрсетті. Фестиваль қалай өткені туралы KAZ.NUR.KZ материалынан оқыңыз.
Алматыда көптен күткен "Азия дауысы" фестивалінің қайта жаңғыруы қала тұрғындарына көптеген қуанышты эмоция сыйлады. 19 жыл өтсе де, көпшілік "Азия Дауысының" даңқы жер жарған, түрлі елдер мен ұлт өкілдерінің мәдени ортасына айналғанын фестиваль болғанын ұмытқан емес.
"1990 жылдардың соңы 2000 жылдардың басы "Азия Дауысында" іс-тәжірибеден өтуші болып, "Шахар" телерадиокорпорациясының қызметкері болып жұмыс жасағанмын. Бүгінгі күн менің балалық шағыма саяхат десем болады. Репортаждар жасайтынмын, қолымдағы радионың диктофонымен қаншама белгілі тұлғалардан сұхбат алғанмын. Сол себепті "Азия Дауысы" мен үшін бұл үлкен ностальгия. Жылдар өтсе де біз тарихи кезеңді бастан өткізіп отырмыз деп ойлаймын. Себебі "Азия Дауысы" биыл фестиваль форматында өтіп жатса, алдағы уақытта халықыралық байқау форматына өтеді деп естідім. Ол дегенің өте қуанышты жағдай", - дейді феставильге арнайы келген танымал тележүргізуші әрі журналист Ләйлә Сұлтанқызы.
Фестивальге жиналған көрермендер арасында алматылықтар ғана емес, өзге елдің азаматтары да болды. Ресейден келген Наталья есімді бойжеткен кешке қатысты өз әсерімен бөлісті:
"Бүгін мен тек жағымды эмоцияларды сезініп отырмын. Біз Ресейден, Екатеринбургтен концертті көріп, саяхаттау үшін келдік. Алматыға Шымбұлақты үшін келдік, осында бұған дейін де болғанбыз. Топтың қонағы ретінде келіп отырмыз", - дейді Наталья.
Барлығы бүгінгі күннің басты хедлайнері - Black Eyed Peas тобының өнерін асыға күтті. Топ кешкі тоғыз жарым шамасында көпшілік алдына шықты.
Black Eyed Peas - адамзат тарихында альбомы ең көп сатылған топтардың бірі болып саналатын, аты аңызға айналған америкалық хип-хоп тобы. Топ құрамында will.i.am, apl.de.ap, Taboo рэперлері және әнші J. Rey Soul бар.
Сол арада фестивальдың кешегі күнінде бой көрсеткен отандық жұлдыздар кештің видеолары мен фотоларын желіде жарыса бөлісуде. Ал бүгін фестивальдың соңғы күнінде "Азия Дауысының" аңыздары өнер көрсететін болады. Көрермендер фестиваль хедлайнерлері - Secret Service пен Ялла тобының өнерін, Роза Рымбаева, Нағима Есқалиева, Жылдыз Осмоналиева, Жәмилә Серкебаева, Медеу Арынбаев және басқа да Орталық Азияға танымал жұлдыздардың шоуын, сондай-ақ салтанатты отшашуды тамашалай алады.
Көпшілік алдында тек аңыздар ғана емес, маусым айында Алматыда өткен балалар мен ересектер арасындағы "Жас қанат" байқауының жеңімпаздарынан құралған өскелең ұрпақ та өнер көрсетеді.
Айта кетерлігі, фестиваль әлемдік жұлдыздарды кеште өнер көрсетуге шақыруды дәстүрге айналдырғанымен көптің есінде. Талай жылдар ішінде фестивальдің хедлайнерлері арасында Captain Jack, Modern Talking, Митхун Чакраборти, Стинг, Тото Кутуньо, Патрисия Каас, Space, Eruption, Сьюзи Кватро, "Ялла" және өзге де әлемдік деңгейдегі танымал тұлғалар болды.
