Ғылым және жоғары білім министрлігі Ұлттық ғылым академиясы құрамындағы саладан тыс мамандардан арылу жұмыстары қалай жүріп жатқанын айтты, деп хабарлайды ҚазАқпарат тілшісі.
Президент Қасым-Жомарт Тоқаев Алматы қаласының жұртшылығымен кездесуде: «Ғылым академиясы ғылымға мүлдем қатысы жоқ адамдардан арылуы керек», - деп мәлімдеген еді.
Осыған байланысты біздің редакция министрлікке «Еңбектері плагиат, еш ғылыми жаңалығы жоқ диссертация жазған «докторлар» әшкереленді ме?», деп сауал жолдады.
Бұған ведомстводан былай жауап берді:
«Жұмыс қорғауға қабылданғаннан кейін 10 жұмыс күні ішінде диссертациялық кеңес докторанттың отандық және халықаралық деректер базалары бойынша плагиатты пайдалануын тексеру үшін диссертацияны «Ұлттық мемлекеттік ғылыми-техникалық сараптама орталығы» акционерлік қоғамына жібереді.
Ал орталық диссертация түскен күннен бастап 10 жұмыс күні ішінде оның мәтінін ашық қолжетімді түрде өзінің интернет-ресурсында орналастырады. Кез келген ғалым танысып, оған өзінің пікірін білдіруге құқылы. Сондай-ақ ашық түрде қорғаудан өтіп, комитеттің қарауына келіп түскен диссертациялық жұмысты сараптау кеңесінің мүшелері тексереді. Сараптау кеңесінің тексеруі нәтижесінде соңғы 2 жылда 6 диссертациялық жұмыстан плагиат анықталып, докторанттар қайта қорғау құқығынан айырылды».
