28 қыркүйекте Көкшетау балалар ауруханасының жансақтау бөлімінде 1,5 жасар сәби қайтыс болды. Оның ата-анасы діни сенімге байланысты баласына қан құйдырмай қойған.
Qazaqstan Media мәліметтері бойынша, 24 қыркүйекте баланы "Авиценна-Бурабай" медициналық ұйымынан көпсалалы облыстық балалар ауруханасының Анестезиология және реанимация бөлімшесіне жеткізді.
Бала 2022 жылы туған, 1 жас 8 айлық.
Диагнозы – ауыр дәрежедегі екі жақты пневмония. Асқыну сепсис, СПОН (уытты кардит, гепатит, нефрит), екінші дәрежелі кома, церебральды ісіну, көру жүйке талшықтарының ісінуі.
Баланың ата-анасы медициналық көмекке уақтылы жүгінбеген.
Пациент келіп түскен күні UMC "Ана мен бала ұлттық ғылыми орталығының" штаттан тыс бас балалар реаниматологымен кеңес өткізілді. Балаға қан құю ұсынылды.
Алайда, бұл процедураны жүргізу үшін кәмелетке толмаған баланың заңды өкілдерінің келісімі талап етіледі.
Баланың ата-анасы діни наным-сенімдеріне байланысты балаға қан құюға келісім бермеді. Басылымның хабарлауынша, олар Иегова куәгерлері ағымына жатады.
Осыған байланысты аурухана шұғыл түрде қан құю мәселесін шешу үшін облыстық және Бурабай ауданының қорғаншылық және қамқоршылық органдарына өтінішпен жүгінді.
27 қыркүйекте қамқоршылық органдары ата-аналармен тағы бір мәрте сұқбат жүргізіп, бірақ оларды қажетті рәсімдерді жүргізуге көндіре алмады. Ата-ана баласының өміріне өздері жауапты екенін растайтын жазбаша қолхат берді.
Ауруханадағылар қабылдау кезінде баланың жағдайы өте ауыр болғанын айтады, өйткені асқыну салдарынан көптеген органдар дұрыс жұмыс істемеген.
28 қыркүйекте жағдайы күрт нашарлаған бала аурухананың жан сақтау бөлімінде қайтыс болды.
Осы мәселе бойынша орталық мемлекеттік органдарға тиісті хаттар дайындалуда.
