Орталық сайлау комиссиясы 30 жылдық тарихында 39 ірі елдік сайлау науқанын өткізді. Бұл туралы аталған комиссияның төрағасы Нұрлан Әбдіров айтты.
«Қазақстан Республикасының заңнамасы сайлаудың кезеңділігін, халықтың түрлі әлеуметтік топтарының билік органдарында өкілдік етуін, сайлау органдары қызметінің ашықтығы мен шынайылығын қамтамасыз етеді. Көптеген халықаралық ұйымдардың белсенді мүшесі бола отырып, Қазақстан еркін және бәсекелі сайлау өткізу бойынша өзіне қабылдаған барлық міндеттемені ұстанады. Мемлекет басшысының, Парламент және мәслихаттар депутаттарының, сондай-ақ әкімдердің сайлауы біздің елімізде ұлттық заңнамаға және адам құқықтарының жалпыға бірдей декларациясына, азаматтық және саяси құқықтар туралы халықарлық пактіге, ЕҚЫҰ Копенгаген кеңесінің құжатында қамтылған демократиялық сайлаудың жалпыға бірдей дамыған қағидаттарына сәйкес өтеді», - деді Нұрлан Әбдіров «Конституциялық реформа және сайлау жүйесі» халықаралық ғылыми тәжірибелік конференциясы барысында.
Оның атап өтуінше, Орталық сайлау комиссиясының құрылған сәттен бергі эволюциясының кезеңдері елдің егемендігінің, оның институттарының қалыптасу тарихымен, олардың дамуымен тығыз ұштасып отырды. Келесі 10 жылдықтарда сайлау заңнамасы мен сайлау жүйесін жетілдіру жалпы кезеңдік саяси эволюция процестерінің аясында өтті.
«Бүгінгі таңда республика азаматтарының сайлау құқықтарының сақталуына кепілдік беретін толыққанды заңнамалық база құрылды. Еліміздің сайлау органдары осы жылдардың ішінде сайлау демкратиясын дамытуда маңызы үлкен 39 ірі елдік сайлау науқанын өткізді. Атап айтқанда 3 референдум, республика Президентінің – 7, Парламент Сенаты депутаттарының – 11, Парламент Мәжілісі депутаттарының – 8 және жергілікті өкілдік органдар мәслихаттар депутаттарының – 8 сайлауы. Бұл ретте 5 елдік науқан – ел Конституциясына толықтырулар мен өзгертулер енгізу жөніндегі референдум, Президентті, Парламент Сенаты мен Мәжіліс депутаттарын, барлық деңгейдегі мәслихаттар депутаттарын сайлау 1 жылдың ішінде, 2022 жылдың маусымынан бастап өткізілді», - деді ОСК төрағасы.
