АҚШ-тың Айова штатындағы Перри орта мектебінде атыс болды. Бір жасөспірім қаза тауып, бесеуі жараланды. Атқан сол мектептің 17 жастағы оқушысы өз-өзіне қол жұмсады. Бұл туралы Bugin.kz тілшісі BBC ақпарат агенттігіне сілтеме жасап хабарлайды.
Бейсенбі күні кешке полиция шенеуніктері сол мектептің 17 жастағы оқушысы Дилан Батлер таңертең мектепке оқ жаудырғанын хабарлады.
Ол помпалық шолақ мылтық пен тапаншамен қаруланған. Полиция оның өзін атып өлтіргенін айтады. Сондай-ақ мектеп ғимаратынан қолдан жасалған жарылғыш зат табылды. Оны саперлар залалсыздандырды.
Полицейлер оқиға орнына 7 минут ішінде жеткен. Кейін полицияға ФБР агенттері мен терроризмге қарсы арнайы бөлімшенің қызметкерлері қосылды.
Жергілікті ақпарат құралдарының хабарлауынша, оқиғадан кейін келген көптеген мектеп оқушылары үйлеріне жіберілген.
Перри орта мектебі штат астанасы Де-Мойнның солтүстік-батысында орналасқан 8 мыңнан астам халқы бар Перри қаласында орналасқан. Ол жалпы саны 1785 оқушысы бар жергілікті қауымдастық мектеп желісінің бөлігі.
