Алматыда «AMANAT» партиясының ұйымдастыруымен Наурызбай ауданындағы 10-11 сынып оқушылары арасында әскерилендірілген эстафета жарысы өтті. Сайысқа Наурызбай ауданында орналасқан 12 мектептен жиналған оқушылар бақ сынасты. Шараның негізгі мақсаты – жастарды отансүйгіштік пен қайсарлыққа баулу. Әскери-патриоттық клубтың тәрбиеленушілері мен «Жас Ұлан» ұйымының мүшелері де эстафетада төбе көрсетті. Әскери бәйгеге қатысқан барлық командаға алғыс хат табысталса, оза шапқан жеңімпаздар бағалы сыйлықтарды еншіледі.
АЙДОС САРЫМ, ҚР ПАРЛАМЕНТІ МӘЖІЛІСІНІҢ ДЕПУТАТЫ, «AMANAT» ФРАКЦИЯСЫНЫҢ МҮШЕСІ:
Біздер қазір әскери патриоттық тәрбие дейтін заң жобасын тұңғыш рет жазып жатырмыз. Құдай қаласа оны жылдың аяғына дейін қабылдаймыз. Соның аясында қазір елімізде әрбір қаланың мектебінде алғашқы әскери жаттығу пәні бойынша «Жас сарбаз» дейтін сыныптар ашылды. Оның ішінде балалар әртүрлі бөлімшелермен, әртүрлі әскери ұйымдармен қарым-қатынасқа түсіп, мінекей «Жас шекарашы», «Жас танкист» деген сияқты бағыттармен өздері үйреніп жаттығып жатыр.
БЕКСҰЛТАН СӘРСЕКОВ, ГЕНЕРАЛДАР КЕҢЕСІНІҢ ТӨРАҒАСЫ:
Әскери бөлімде осындай жарыс өткізіп, оны нақты әскери азаматтардың өзінің білімін, жеткен жетістіктерін көрсе, жастар басқаша қарайды. Сондықтан бүгін осыны өткізіп, біздің үмітіміз болашақта осы жастардың арасында мүмкін біреулер әскерге барар, мүмкін басқа мамандық табар. Бірақ біздің мақсат – олар азамат болсын, ертең Отан қорғаушысы болсын деген мақсатпенен келіп жатырмыз.
