Енді букмекерлік кеңсеге тіккен ақшаны қайтаруға болады. Желіде осындай ақпараттың тарағанына біраз болды. Баюдың кілтін бәстен іздегендер жаңалықты естіп, қуанып қалды. Оқымаған «заңгерлер» ақшасын берсең, бес минутта теңгеңді теңгеріміне аударуға дайын. Аңқау елге арамза молда болғандардың әрекеті қаншалықты заңды? Оларды кім қадағалайды? Аружан Задабек тақырыпты зерттеді.
Тәуекел түбі жел қайық, өтесің де кетесің. Уайым түбі тұңғиық, батасың да кетесің. Ғасырдан келе жатқан бұл мақалды құмар ойынға жаны құмарлар өздерінше қабылдайды. Осылай жүріп құмарлықтың соңы құрдым екенін де байқамайды. Жай ғана бәс кігемін деп, бас тіккенін аңғармайды.Қазір мұндайлардың саны 400 мыңнан асқан. Олардың букмекерлік кеңсеге берген қаржысын есептесең, бас шайқайсың. Енді ойынды тастаймын, жаңа өмір бастаймын дегендерге жаңа дәуір келді. Бүкіл берген теңгесін шешіп ала алады екен. Мұны желідегі заңгерлер сүйіншілетті.
«Тілегенің алдыңнан іздемей-ақ табылар» дегендер пост астына жарыса жазып жатыр. Мен мұндалатқандардың тілеуі – бір. Аңсағаны - аңғармай берген ақшасын қайта шешу.
1. 2,5 миллион болып тұр. Қаншасын шығаруға болады?
2. Счет аресте болуы шарт емес. Маған бүгін қайтарды 237 812 теңгені.
3. Әйелінің атынан ойнаған бола ма? Қайта ма?
Көмектесемін дегендер барлығы заң жүзінде жүзеге асатынын айтады. 9 қыркүйектегі заңға сәйкес әрекет етеміз деп сендірген. Бірақ заңгерлер бұл аса мұқият зерттеуді талап етеді дейді. Өзгеге сеніп, өз ақшамды шешіп аламын деп жүргенде бармақ тістеп қалмауға кеңес берді.
ЖАНДОС ТҰЯҚОВ, ЗАҢГЕР:
Азаматтық сотқа азаматтардың жүгінуіне құқығы бар. Бірақ менің ойымша ол азаматтар сотта жеңіліп қалады. Сол күйі жабылған қазан жабылып қала береді.
Ал, ойын бизнесін және лотереяны реттеу комитеті ақпарат шындыққа жанаспайды дейді. Егер азамат бәс тіксе оның өз еркімен салған қаржысы қайтарылмайды. Керісінше, оның заңсыз екені анықталса әкімшілік жауапкершілікке тартылады. Сондықтан желідегі жалған жаңалыққа алданбауға шақырды.
НҰРЛАН ТҰРМАҒАНБЕТ, ҚР ТУРИЗМ ЖӘНЕ СПОРТ МИНИСТРЛІГІ ОЙЫН БИЗНЕСІН ЖӘНЕ ЛОТЕРЕЯНЫ РЕТТЕУ КОМИТЕТІ БАСҚАРМАСЫНЫҢ БАС САРАПШЫСЫ:
Комитет тарапынан расталған жеткілікті дәлелдемелер ұсынылған жағдайда белгіленген тәртіппен құқықтық субъектісіне, яғни ойын бизнесін ұйымдастырушыға қатысы жоспардан тыс тексеру жүргізуге бастама жасайтын болады.
Наурыздан бастап азаматтар құмар ойынның құрығына түсіп қаламын-ау деп қорықса, өздерін шектей алатын мүмкіндікке ие болды. Қазірдің өзінде eGov мобильді қосымшасы арқылы 168 250, жазбаша 2 311 тұрғын өтініш тастаған. Өзін шектегендердің көбі -31 мен 35 жас аралығындағылар.
