Ақтөбенің іргесіндегі Ақжар-2 ауылының тұрғындары тас жолдан өтуге қорқады. Мұнда бір айдың ішінде үш адамды көлік қағып кетіп, қаза тапқан. Қаламен ауылды байланыстырып тұрған жолда не жарық жоқ, не бағдаршам іске қосылмаған.
БАҚЫТ ҚАЗАНҒАПҚЫЗЫ, ТІЛШІ:
Бұл Ақжардың жолын халық «Ажал жолы» деп атап кеткен. Бір айдың ішінде бұл жолда үш адамды көлік қағып қаза тапты. Бұл жол бойында орналасқан бағдаршамның бірде біреуі де жұмыс істемейді.
Жол былтыр күрделі жөндеуден өткен. Жүргінші жолағы бар, бірақ бірде бір бағдаршам іске қосылмаған. Жол бойында бағаналар қақайып тұрғанымен жарық жоқ.
ҮМІТЖАН АБДУЛЛИНА, ТҰРҒЫН:
Өзіміз даже балалар түгіл жолдан өтуге қорқамыз. Машиналар деген мен ондай скоросты білмеймін даже. Адамдар өтетінін біледі. Мына жерде аялдама бар. Неге сол жылдамдықты азайтуға болмайды. Міндетті түрде адам өлімі тіркелу керек па?
АНАРБЕК АЙЖАРЫҚОВ, ТҰРҒЫН:
Бір айдың ішінде үш адамды басып кетті. Светофорды іске қоссын. Светофордың қасында жарық болу керек. Жаяу жүргінші полосасы болу керек.
Бүгін түнде жолдан өтіп бара жатқан 48 жастағы тұрғын қаза тапты. Оны «ВАЗ -2110 » автокөлігі қағып кеткен.
ЕРҰЗАҚ БАЙМАҒАМБЕТОВ, ТҰРҒЫН:
Міне хабар келіп жатыр. Түнде болып жатыр. Өткенде Марат деген жігіт қайтыс болды. Ол да көршіміз. Ол осы арадан өткен. Тіптен адам өткелінде қағып отыр оны.
Бұл жол- көлік оқиғасына қатысты полиция қылмыстық іс қозғады. Қазір тергеп-тексеру жүріп жатыр. Мәселені «Аманат» партиясының депутаттары да өз бақылауына алған.
ЕСТАЙ СИСЕНБАЕВ, ОБЛЫСТЫҚ МӘСЛИХАТ ДЕПУТАТЫ, «AMANAT» ФРАКЦИЯСЫНЫҢ МҮШЕСІ:
Жолға жылдамдықты шектейтін скоростомер дейді ғой сондайлар қою керек. Сергек камералары бар. Алдағы уақытта осы жолдың барлығын халыққа тиімді пайдаланатын қылып жасағымыз келіп отыр.
Әкімдіктегілер бұл жолдың ресми түрде тапсырылмағанын айтады. Жол бойына әзірге сегіз бағдаршам орнатылған.
ӘСЕТ ҚАЛИЕВ, ҚАЛАЛЫҚ ПОЛИЦИЯ БАСҚАРМАСЫНЫҢ БАСТЫҒЫ:
Бұл жолды әлі тапсырған жоқ. Жолды тапсыру келер жылға жоспарланған. Қажетті белгілер орнатылған. Жарықтандыру да бар. Бағдаршамды қосу мәселесі осы жақын арада бір,екі күнде шешілу керек. Біз полиция тарапынан Әкімшілікке ұсыныс енгіздік.
Жоба бойынша 11 бағдаршам, 28 аялдама болу керек. Бұл жұмыстар келер жылы аяқталады.
