Түркістан облысындағы кейбір ауылдарда әлі күнге дейін ұялы байланыс жоқ. Алыстағы ағайыннан хабар алу үшін қыр асып, тіпті аудан орталығына қарай жолға шығамыз дейді тұрғындар. Ал әкімдіктің есебінше, мобильді байланыс болмағанмен, қазақтелекомның кабельді желісі 98 пайыз қосылған. Тұрғындар мен атқамінерлердің жауабын тыңдаған әріптесім тарқатсын.
АЙЗАДА ТӨРЕБЕКҚЫЗЫ, ТІЛШІ:
Төлеби ауданындағы Шахта Тоғыс елдімекені мына сайда орналасқан. Бұл – аудан орталығы Леңгір қаласынан шамамен 4-5 шақырымдай ғана қашық жерде. Соған қарамастан мұнда интернет-байланыс деген атымен жоқ. Сондықтан үлкен-кіші айналамен хат-хабар алмасу үшін осы қырға жиналуына тура келеді.
Ұялы байланыс ұстайды деп дала кезкен жұрт кейде бұған да зар болып қаламыз дейді. Желді күндері тіпті қалаға қарай бірнеше шақырым жаяу -жалпы тағы салпақтауға тура келетінін айтады. Өйткені екінің бірінде көлік жоқ. Әсіресе мектеп бітіргелі жүрген оқушылар қатты қиналып жүргендерін жеткізді. Себебі барлық дүние бүгінде ғаламторға тәуелді.
БАҒДӘУЛЕТ ЕРГЕШБАЙ, 11-СЫНЫП ОҚУШЫСЫ:
Бізге ҰБТ-ға дайындалу өте қиын болып жатыр. Қазір енді күн суық, қыс мезгілі де кеп қалды. Ауылдан, сонау ауылдан жаяу шығу да бізге оңай боп жатқан жоқ. Көк тайғақ. Осы жақа келіп сетьпен отырып сабағымызды істейміз. Күні-түні былайша айтқанда осы қырда жүреміз.
Тұрғындардың айтуынша, мұнда 200-ге жуық үй бар. Ауылда мектеп, интернат, медпункт, балабақша жұмыс істеп тұр. Кейбір үйлер мен мекемелерде ғана вай-фай желісі бар. Бірақ, оның өзі мардымсыз көрінеді.
ДОЛАН САРТАЕВ, ШАХТА ТОҒЫС ЕЛДІМЕКЕНІНІҢ ТҰРҒЫНЫ:
Скорыйды шақырта алмаймыз біз. Скорыйды шақырту үшін мына қырға шығамыз, немесе машинасы бар адам машинаға мінеді де Леңгірге барады. Оған қанша уақыт кетеді. ..Мына жерде ауырып жатыр ма адам, өліп жатыр ма?!.. Біз солай күн көреміз.
СЕЙТХАН ЖАҚСЫБАЕВ, ШАХТА ТОҒЫС ЕЛДІМЕКЕНІНІҢ ТҰРҒЫНЫ:
Осы ұялы телефонды айтқанымызға, өзімнің барлық жерге хат жазып, жіберіп неғылғаныма тура екі жыл болды ғой. Ешкім бізге көмек бермей жатыр.
Ауыл маңында әскери бөлім мен түзеу мекемесі де бар. Байланыстың болмауына биліктегілер ауылдың түзеу мекемесіне тым жақын орналасуымен байланыстыратын көрінеді. Алайда тұрғындар оның қисыны жоқ деп отыр.
НУРИДДИН АМАНЖОЛОВ, ШАХТА ТОҒЫС ЕЛДІ МЕКЕНІНІҢ ТҰРҒЫНЫ:
Бармаған, баспаған тауымыз қалмады. Олар былайша сөзбен айтып кетеді: «бәрін істейміз, осындай жағдай жасаймыз»,- дейді .
Аққұм, Жаңа күш ауылында да мобильді интернет жоқ. Әкімдік өкілі мәселені шешу үшін жұмыс жүріп жатқанын жеткізді. Ұялы байланыс болмағанымен, 149 үйдің 98 проценті қазақтелекомның кабельді интернетімен қамтылған дейді.
БЕЙБІТ ТӨЛЕШОВ, АҚПАРАТТАНДЫРУ ЖӘНЕ МЕМЛЕКЕТТІК ҚЫЗМЕТ КӨРСЕТУ МОНИТОРИНГІ БӨЛІМІНІҢ БАСШЫСЫ:
Шахта Тоғыс елдімекенін барып көрдіңіздер ғой, ол сайда орналасқан. Ал базовый станса елді мекенге кірмей жатып оң жағында қырда орналасқан. Соны қырдың мына бетінен сол бетіне орналастырады, сол кезде елді мекенге жақындайды. Жылдың соңына дейін ауыстырамыз деген уәдесі бар.
Ұялы байланыс операторы талайдан жыр болған байланыс мәселесін жыл басында осылай шешуге келіскен көрінеді. Енді мобильді байланыссыз күн кешіп жүрген халық аяқталуға аз-ақ қалған сол уәделі күнді күтуден басқа амалы жоқ болып тұр.
