Енді басшылар ештеңені жасыра алмайды. Бармақ басты, көз қысты кезең артта қалды. Өйткені Үкіметтің жұмысын бұдан бұлай жасанды интеллект қадағаламақ. Бюджетке қаржы жетпесе былш еткізіп шығырып береді екен. Әкім жұмыс істемесе, оны да жайып салады. Жасыратыны жоқ жоба туралы министр мәлімдеді. Әзілмен басталған жиын туралы әріптесім Аружан Задабек әңгімелейді.
Жалған сөз, өтірік ұранға жол жоқ. Құр мәлімет, құрастырылған статистика енді айтылмайды. Есеп берген басшыны көрсек, сенбесек те сенгендей сынай танытпаймыз. Айтқанына алданып, көз жұму да жағынан. Өйткені жасанды интеллект бәрін бәрібір жайып салады. Оған қыз қысып, қалтасына теңге де қыстыра алмайсың. Көңілге қарап, адамгершілік те танытпайды. Адамдыққа салып, қатеңді кешіруі екіталай. Минитср Мәдиев құр жатпай осындай жүйе ойлап тауыпты.
ЖАСЛАН МӘДИЕВ, ҚР ЦИФРЛЫҚ ДАМУ, ИННОВАЦИЯЛАР ЖӘНЕ АЭРОҒАРЫШ ӨНЕРКӘСІБІ МИНИСТРІ:
Біз осы арқылы біраз адамның жұмысын жеңілдетеміз. Қазақстанда жасанды интеллекті дамыту үшін 5 жылдық тұжырымдаманы Үкіметте қабылдадық. Осы тұжырымдама бойынша бірнеше маңызды бағыт бар. Жасанды интеллектіні оқыту да ойда бар.
Мәдиевтің бүгінгі мәлімдемесін естіген кей әріптестерінің көңілі құлазып қалған болар. Енді қанша жасырып қаламын десе де, жасанды зейін зеректігін көрсетеді. Алдында зыр жүгірсең де сен істеген қателікті айна қатесіз көрсетіп береді. Саспайды, састырады. Бетіңе қарап тұрып былш еткізуі мүмкін. Бұл - төрде отырған тұлғаларға тақым қысатын кезең енді келді деген сөз.
СВЕТЛАНА ЖАҚЫПОВА, ҚР ЕҢБЕК ЖӘНЕ ХАЛЫҚТЫ ӘЛЕУМЕТТІК ҚОРҒАУ МИНИСТРІ:
Жасанды зейін тәуекел аймақтарының факторларын да анықтайды. Мысалы Риддерде кірісі жоқ 141 отбасы бар. Әкімдер осы факторлармен нақты жеке жұмыс істеуі керек. Баспанасыз отбасылардың саны – 166. Әр санның артында белгілі бір отбасы тұр.
Министр бұл жүйе туралы аузын толтырып айтты. eGov-тағы жаңа көмекшісі тек жемқорларды көрсетпей, өзге де жағдайда қолғабыс болады дейді. Мысал болсын деген Мәдиев некені қалай тіркеуге болатынын көрсетпек болып еді, жүйе иесінің айтқанын орындамады. Тіпті, қабылдауға да құлық білдірмеді. «Сіз некедесіз» деп қайырды, қысқасы. Мұны көрген Үкімет басшысы тыныш қалсын ба?! Жаңадан тіркелмек болған басшыға кешке "әйеліңізбен әңгіме қиын болайын деп тұр" деп әзілдеді.
Мәдиев те әзілден құр алақан емес екен. Жүйені ешкім алдай алмайды деп жауап қатты.
Не болса да жасанды интеллект біраз адамның орнын басқалы тұр. Біраз маманның қызметін өзі атқарып, жұмыссыз қалдыруы мүмкін. Байбалам салып жатқан мен жоқ. Министрдің айтқаны осы. Бірақ мінсіз нәрсе жоқ. Қанша технология дамып жатыр десек те, бәріне бірден көшіп кетеміз дегенге сену қиын. Өйткені цифрлық қызметтердің дені қарапайым халық үшін тым күрделі екенін көріп отырмыз. Түсініксіз тұстары жетіп жатыр.
ОЛЖАС БЕКТЕНОВ, ҚР ПРЕМЬЕР-МИНИСТРІ:
Бүгінде азаматтардың көпшілігі жасанды интеллект туралы біле бермейді. Цифрлық қызметтердің дені қарапайым халық үшін күрделі. Оларды барынша оңайлату керек. Оларды қалай пайдалану керектігі туралы халыққа кеңінен түсіндіру қажет. Қазір елімізде цифрлық тиехнологиялар мен жасанды интеллект құралдарын енгізіп, іске асырып жатқан өндіріс орындары бар. Цифрлық даму министрлігіне мүдделі орындармен және әкімдіктермен бірге осындай кәсіпорындарды қолдаудың нақты шараларды әзірлеуді тапсырамын.
Былтыр тұрғындар eGov арқылы 44 млн қызмет алған. Екі мыңнан астам оқушы тамақты электронды негізде рәсімдеуге мүмкіндік алды. Мемлекеттік дәріханалар жүйесі 100% осы жобамен қамтылған.
