2025 жылы көпбалалы ата-аналар айына қосымша 90 мың теңге үнемдей алады. Бұл қандай жаңашылдық екенін BAQ.KZ жазды.
2025 жылдан бастап Қазақстанда көпбалалы отбасылар үшін салық жеңілдіктері енгізіледі. Бұл өзгерістерге сәйкес, төрт немесе одан да көп баласы бар ата-аналарға ай сайын шамамен 90 мың теңге көлемінде салықтық жеңілдіктер қарастырылған.
Сарапшылардың пікірінше, барлық қажетті құжат ұсынылған жағдайда, көпбалалы отбасылар салық түріндегі шығынды айтарлықтай үнемдей алады.
Салық жеңілдіктерінің мөлшері
Көпбалалы отбасылар жылына жалпы 2,2 миллион теңгеге дейін салық үнемдей алады (564 МРП). Бірақ бұл жеңілдік барлық азаматтарға бірдей әсер етпейді. Ол тек табыс деңгейі мүмкіндік беретін отбасылар үшін толық көлемде қолданылады.
Мысалы:
• Бір ата-ана 23 АЕК көлемінде жеңілдік алады (2025 жылы – 90 436 теңге айына).
• Егер жеңілдік екі ата-анаға тең бөлінсе, әрқайсысы 12 АЕК (47 184 теңге) мөлшерінде пайдалана алады.
Жеңілдікті қолдану шарттары
Салықтық жеңілдік тек келесі жағдайларда беріледі:
1. Балалар саны: Отбасында 1 қаңтардағы жағдай бойынша 18 жасқа толмаған төрт немесе одан көп бала болуы қажет.
2. Құжаттар: Балалардың туу туралы куәліктерінің көшірмелері ұсынылуы тиіс.
Сарапшылардың айтуынша, жеңілдікті алу үшін жұмыстағы есеп бөліміне бару қажет.
Яғни ата-ана балаларының туу туралы куәлігін өткізіп, 2025 жылы көпбалалы ата-аналар жыл басында 18 жасқа толмаған төрт және одан да көп баласы болған жағдайда айына қосымша 90 мың теңгені (жылына 1,1 миллион теңге) салыққа бермеуге мүмкіндік алады.
Жаңа мүмкіндіктер
Салық жеңілдіктеріне тек табыстан алынатын стандартты шегерімдер ғана емес, сонымен қатар қосымша шығындарды өтеу кіреді:
• Ерікті зейнетақы жарналары;
• Оқуға жұмсалған шығындар (мектепке дейінгі ұйымдар, колледждер, университеттер);
• Медициналық қызметтер (косметологиялық емес).
Мысалы, оқу шығындарына салықтық жеңілдік 118 АЕК-ке дейін (2025 жылы – шамамен 460 мың теңге) беріледі. Бұл жеңілдікті ата-аналардың бірі немесе қамқоршысы пайдалана алады. Ал медициналық қызметтерге арналған жеңілдіктер дәл осындай мөлшерде қолданылады.
Негізгі шектеулер
Жеңілдіктердің жалпы сомасы бір жылда 564 АЕК-тен (2,2 млн теңге) аспауы тиіс. Сонымен қатар, жеңілдіктерді ретімен қолдану қажет:
1. Міндетті зейнетақы жарналары;
2. Әлеуметтік және медициналық сақтандыру төлемдері;
3. Стандартты салықтық шегерімдер.
Көпбалалы отбасыларға пайдасы
Бұл өзгерістер көпбалалы отбасылардың күнделікті шығындарын азайтуға көмектеседі. Негізінен үнемделген қаражат азық-түлік, балалар киімі және коммуналдық қызметтерге жұмсалады. Сонымен қатар, бұл жеңілдіктер отбасылардың оқу мен медицинаға жұмсайтын шығындарын азайтуға мүмкіндік береді.
Қазақстанның салық кодексіне енгізілген бұл өзгерістер көпбалалы отбасылардың қаржылық жағдайын жақсарту үшін маңызды қадам.
