Тобыл-Торғай өңірі- тұңғыштар мекені. Аймаққа алғаш келген кабинасыз шағын тракторды тізгіндеген Ғайникамал Тәткенова да осы өлкенің тумасы.Тұсында көп бейнет көрген көнекөз қария бұл күндері ұл-қызының қызығына кенеліп,шөбере-шөпшек қолынан су ішіп отыр.
Әкесінен үш жасында айрылып, анасына қолқанат болған Ғайникамал әже еңбекке ерте араласқанын айтады.Тыл ардагері сұрапыл соғыс жылдары трактор тізгіндеп, жеңіс күні жеткенше қырда тер төккен.
ҒАЙНИКАМАЛ ТӘТКЕНОВА, ТЫЛ АРДАГЕРІ:
Басқарма сосын тракторшыға барасың әйтпесе ПЗУ ға жіберем деді. Шешем үш баламен үйде. Жаман уақыт.Аштық уақыт.Соғыс уақыты.Сосын не істейін сол Боровойда қыстай оқыдым трактор оқуын.Сосын тракторшы болып, соғыс біткенше трактор айдадым.
Кейуана әлі тың. 99 жасқа келсе де іс тігіп отыр.Еңбек ғана адамды еңселі етеді. Ұрпағыма да осыны үнемі айтып отырам, дейді ғасыр жасаған қария.
ҒАЙНИКАМАЛ ТӘТКЕНОВА, ТЫЛ АРДАГЕРІ:
Неше түрлі ауыр жұмыс істей жүріп өзім кілем тоқып, кісілерге іс тіктім.Көрпе тігіп, камзол тігіп оларға іс істедім.Пенсиям жақсы.Бәрі бар.Ал бірақ сонда да адам еңбек ету керек шама келгенше.
Бір қолымен колхозға жұмыс істеп, екінші қолымен бесік тербеткен алтын құрсақ ана он балаға тағылымды тәрбие беріп, қатарынан қалдырған жоқ.Ұл-қызы түгел іргелі оқу орындарын тәмамдап, еліне елеулі қызмет етті.Үлкен баласы 78 жаста, кенжесі алпыста.
ӘДІЛБЕК ХАЙДАР, БАЛАСЫ:
Бала кезінен бізге айтты.Еңбекқор болыңдар.Жұмыс істеңдер.Ешкімнің ала жібін аттамаңдар деген сияқты.Бәріміз де жоғары білім алдық.Әлі күнге дейін айтқанымен ғана жүреміз.
Бейнеттің зейнетін көргенге не жетсін. Отағасы өмірден ерте озды. Бейбіт заманның берекесі мен ұрпағымның мерекесін көріп отырмын дейді ғазиз жан. Тұсында жер ауып келген түрлі ұлыстармен бір тілім нанды бөліп жедік.Бір шаңырақ астында бірлік құрдық.Одан ешкім ұтылған жоқ.Талай ұлтқа пана болған қазақ жерінде тек тыныш заман болсын деп батасын берді.
