Атырау облысындағы Талдыкөл ауылы халқы тасқын су шайған кірме жолдың әлі күнге жөнделмей тұрғанына наразы. Салдарынан облыс орталығына қатынайтын жалғыз жолда көлік апаты жиі болып, өмірімізге қауіп төніп тұр,- дейді жұрт. Жауаптылар жобаға өзгеріс енгізіп, комиссияның шешімін күтіп отырмыз,- дегенді сылтауратады.
Талдыкөл ауылының жұрты былтыр бірнеше күн бойы облыс орталығымен байланыс үзіліп, сабақ пен жұмыстан қалып, әбден қиындық көрген. Содан бері айналдырған 6 жарым шақырым кірме жолды салмай, әбден сабылтып қойды,- деп ашулы.
РҮСТЕМБЕК АСИЛОВ, ТАЛДЫКӨЛ АУЫЛЫНЫҢ ТҰРҒЫНЫ:
Талдыкөл ауылы облыс орталығынан 23 шақырым жерде. Кірме жол ұзындығы 7 шақырым. Оның 4 шақырымы жүруге әзірге болады. Қалған 3 шақырымын жасауға қандай проблема? Пгс Индерден шығады. Қиыршық тас Ақтөбеден алып келсін. Асфальт өзіміздің Атыраудан шығады. Қандай проблема? Біз соны түсінбейміз.
1200ден астам халқы бар Талдыкөл ауылындағы бұл жол құрылысы тасқыннан бұрын басталған. Ол үшін бюджеттен 2 млрд теңгеге жуық қаржы бөлінген. Бірақ кейін жобаны өзгертуге жіберіпті. Жол құрылысы кезінде көлік қозғалысы үшін топырақтан айналма жол төсеп берген. Жауын-шашын салдарынан батпаққа айналып жатыр. Кірме жол да солай, астан-кестен күйде. Талдыкөлдіктер әкім-қара келетін кезде ғана техника толтырып қояды,- дейді.
АРҒЫН АЙТҚАЛИЕВ, МЕРДІГЕР КОМПАНИЯНЫҢ УЧАСКЕ БАСТЫҒЫ:
Топырақ төгіп жатырмыз. Қазірге дейін 26 мың куб топырақ төктік. Су өткізгіштерді қондырып жатырмыз. Сендер жасайсың бір көзден сендерге береміз жұмысты деп өз күшімізбен жасап жатырмыз.
Енді өзгеріс енген жаңа жоба бойынша 6,5 шақырым кірме жол құны 5 млрд 100 млн теңгеге қымбаттады. Егер комиссия қолдаса, құрылыс жанданады,- дейді әкімдіктегілер.
АСЫЛХАН ШАКИМОВ, МАХАМБЕТ АУДАНДЫҚ ТҮКШ БӨЛІМІНІҢ БАСШЫСЫ:
Басында тек қана бетіндегі асфалтын алу болды ғой. Ендігі бұл жерде лаборатория, жолдың негізгі қабаты нормативке сай болмағандықтан негізгі қабатын ауыстыру керек. Көрдіңіз бе, сол себептен қымбаттап тұр. Егер осы комиссиядан өтсек, ақша бөлінген кезде екі жыл саланады әлі де.
Ақша бөлінген күннің өзінде жыр болған кірме жол құрылысы екі жылға созылады,- дейді әкімдік өкілі. Биыл тек су өткелдерін ғана орнатпақ. Ал былтырдан бері ауылдан шығуы мұңға айналған ауылдықтар жолды тезірек бітіріп беруді сұрап отыр.
