Қарағандыда отқа төзімді материалдар шығаратын зауыт ашылды. Бұл Қазақстанда жоғары технологиялық монолитті өнім өндіретін тұңғыш кәсіпорын. Елімізге ондай материалдар бүгінге дейін шетелдерден тасымалданды. Сондықтан аталған жоба отандық өнім көлемін ұлғайтуға септігін тигізбек.
Зауыттың ашылу салтанатына облыс әкімі Ерлан Қошанов қатысты. Аймақ басшысының айтуынша, отқа төзімді материалдар шығаратын зауыт экономиканы модернизациялау бағдарламасын жүзеге асырудың айқын көрінісі. Ол «Сарыарқа» арнайы экономикалық аймағында орналасқан. Құны 2 млрд теңге. Жобаны толықтай «Seven Refractories Asia» ЖШС қаржыландырып отыр. Кәсіпорын жылына 45 тонна отқа төзімді материалдар шығарады деп жоспарланған. Ол өнімдер жоғарғы температурада жұмыс істейтін қондырғыларды ыстықта еріп кетуден сақтайды. Өндірушілер, қалдықсыз, жоғары технологиялық монолитті өнім өндіреміз, деп отыр. Ол материалдар цемент, түсті және қара металлургия, сондай-ақ мұнай және газ өндірісінде қолданылады. Зауыт бүгінгі таңда шикізатты Қытайдан тасымалдағанымен, болашақта отандық шикізатқа көшуді жоспарлап отыр. Қазақстандық өнімді қолдау аясында зауыт инвесторына бірқатар жеңілдіктер берілген.
Максим Глазунов, «SEVEN REFRACTORIES ASIA» ЖШС бас директоры:
Бізге жеңілдіктер көп. Кіріс пен мүлік салығы мүлде жоқ. Бұл өнімнің бағасын арзан ұстауға мүмкіндік береді. Зауыттың «Сарыарқа» арнайы экономикалық аймағында орналасуы тегін емес. Бұл ірі Арселор Миттал Теміртау компаниясына жақын жер, сондай-ақ Ресейдің Сібірі мен Уралынан да алыс емес. Ол өте тиімді.
Отқа
төзімді материалдар зауытының басшысы бүгін «Арселор Миттал Теміртау»
компаниясы мен «Қазақмыс» корпорациясымен өзара әріптестестік туралы
меморандумға қол қойды. Қазақстанда отқа төзімді материалдар қолданатын алпауыт
кәсіпорындар осылар. Әзірге олардың жылына қанша тонна Қазақстан өнімін алуға
келісетіні белгісіз.
