Батыс Қазақстан облысы полиция департаменті "Заң мен тәртіп" қағидатын іске асыру аясында ұйымдасқан қылмысқа қарсы күрес бағытындағы жұмыстарын жалғастыруда.
Осы бағыттағы жедел-іздестіру іс-шаралары барысында Орал қаласында бірнеше бопсалау дерегінің жолы кесілді. 9 шілдеде полиция қызметкерлері бұрын сотталған 35 жастағы облыс тұрғынын ұстады. Тергеу барысында оның қаңтар-шілде айлары аралығында жәбірленушіні қорқытып, одан жалпы сомасы 3,3 млн теңге бопсалағаны анықталды. Тергеу мәліметіне сәйкес, күдікті жәбірленушімен 2025 жылдың соңында ортақ таныстары арқылы танысқан. Кейін аралас-құралас болған кезде бірнеше рет қарызға ақша алып жүрген. Алайда биыл қаңтар айында жәбірленуші қарыз беруден бас тартқаннан кейін күдікті оған қоқан-лоққы көрсетіп, бірнеше ай бойы заңсыз түрде ақша талап еткен. Соның салдарынан жәбірленуші оған жалпы 3,3 млн теңге берген. Жедел-іздестіру іс-шараларының нәтижесінде күдікті ұсталып, уақытша ұстау изоляторына қамалды. Бұдан бөлек, ағымдағы жылдың маусым айында ұйымдасқан қылмысқа қарсы күрес басқармасының қызметкерлері жүргізген жедел іс-шаралар барысында тағы бір бопсалау фактісі әшкереленді. Үш жас азамат күш қолданып, Орал қаласының 18 жастағы тұрғынына тиесілі iPhone 14 ұялы телефонын иемденгені анықталды. Аталған іс бойынша күдіктілердің бірі уақытша ұстау изоляторына қамалды. Барлығы өз кінәларын мойындады. Тергеу барысында ұрланған телефонның қаладағы дүкендердің біріне сатылғаны анықталып, полиция қызметкерлері оны тәркілеп, қылмыстық іс бойынша заттай дәлелдеме ретінде тіркеді.
