Қазақстанда темекі шегетіндер өкпе обыры скринингінен тегін өтетін болды

В және С вирустық гепатиттерін ерте анықтауға бағытталған тексерулердің ауқымы кеңейтілді

Денсаулық сақтау министрлігі скринингтік зерттеулер жүргізу тәртібін жаңартты. Енді профилактикалық тексерулер бағдарламасына алғаш рет өкпе обырына арналған скрининг енгізіліп, В және С вирустық гепатиттерін ерте анықтауға бағытталған тексерулердің ауқымы кеңейтілді.

Тиісті өзгерістер «Скринингтік зерттеулерге жататын адамдардың нысаналы топтарын, сондай-ақ осы зерттеулерді жүргізу қағидаларын, көлемі мен кезеңділігін бекіту туралы» бұйрыққа енгізілді.

Жаңа қағидаларға сәйкес, өкпе обырына скринингтен 50-70 жас аралығындағы (тиісті жасқа толатын жылы) ерлер мен әйелдер өте алады. Ол үшін мына талаптарға сай болуы қажет:

• бронхтар немесе өкпенің қатерлі ісігі диагнозымен диспансерлік есепте тұрмауы;
• темекі шегетін және шылым шегу өтілі 20 қорап-жылдан (pack-year) кем болмауы;
• немесе темекіні тастағанына 15 жылдан аспауы;
• соңғы 10 жыл ішінде Еңбек және халықты әлеуметтік қорғау министрлігі бекіткен зиянды еңбек жағдайларындағы мамандықтар бойынша жұмыс істеуі.

Сонымен қатар Денсаулық сақтау министрлігі В және С вирустық гепатиттерін ерте анықтау бағдарламасын да кеңейтті.

Енді 18 жастан асқан ерлер мен әйелдер төмендегі талаптарға сәйкес келген жағдайда тексеруден өте алады:

• В және С созылмалы вирустық гепатиттері бойынша диспансерлік есепте тұрмауы;
• жүктілік бойынша есепте тұрмауы.

Өзгерістер Қазақстан Республикасының нормативтік құқықтық актілерінің электрондық эталондық бақылау банкінде жарияланды.