11-17 тамыз аралығында Түркияның Ыстамбұл қаласында мектеп оқушылары арасындағы IGeO-2026 халықаралық география олимпиадасы өтіп жатыр.
Беделді зияткерлік жарыста қатысушылардың теориялық білімі, картографиялық талдау, далалық зерттеу және географиялық ойлау дағдылары бағаланады.
Қазақстанның ұлттық құрамасы республикалық география олимпиадасының жеңімпаздары мен жүлдегерлерінен жасақталған. Ел намысын төрт оқушы қорғауда:
• Енбахтов Андрей - Қостанай қаласындағы NIS-тің 11-сынып оқушысы;
• Дарынов Амир - Шығыс Қазақстан облысындағы дарынды балаларға арналған мамандандырылған «Білім-инновация» лицей-интернатының 11-сынып оқушысы;
• Бекбол Дарын - Жетісу облысындағы Мұхтар Арын атындағы №24 мамандандырылған лицейінің 10-сынып оқушысы;
• Козленко Алан - Шығыс Қазақстан облысындағы дарынды балаларға арналған мамандандырылған «Білім-инновация» лицей-интернатының 11-сынып оқушысы.
Құрама жетекшілері - республикалық және халықаралық олимпиадалардың бірнеше дүркін жүлдегері Дүйсен Абай және NU студенті Искендиров Алмас.
Қазақстандық оқушылар IGeO олимпиадасына 2012 жылдан бері тұрақты қатысып келеді. 2025 жылы ұлттық құрама әлемдік командалық рейтингте тарихи екінші орын алып, екі алтын және екі күміс медаль жеңіп алды. Осы жылдар ішінде жас географтар 5 алтын, 4 күміс және 7 қола медаль иеленді.
