Жамбыл облысында Toyota RAV4 көлігі жолда жүрген 36 жастағы ер адамды қағып, ол ауыр жарақатпен ауруханаға жеткізілді. Оқиғаға қатысты қылмыстық іс қозғалды.
Жол-көлік оқиғасы Тұрар Рысқұлов ауданында болған. HALYQSTAN мәліметінше, апатқа дейін жолда келе жатқан көліктердің бірі сиырды қағып кеткен. Содан кейін бірнеше ер адам жолдағы малдың өлексесін алып тастауға тырысқан кезде, олардың бірін Toyota RAV4 көлігі қағып кеткен.
Жәбірленуші реанимацияға жатқызылған. Алдын ала мәлімет бойынша, оның жабық бас-ми жарақаты, миы зақымдануы, пневмоторакс, білек пен жіліншік сүйектерінің сынуы бар. Ауруханаға түскен кезде ер адам травмалық шок жағдайында болған.
Жамбыл облысының полиция департаменті жол-көлік оқиғасының болғанын растады. Ведомствоның алдын ала мәліметінше, «Б.» есімді азамат басқарған Toyota көлігі жолда жүрген ер адамды қағып кеткен.
Әлеуметтік желілерде көлікті бұрынғы Мәжіліс депутаты Бақытжан Базарбек басқарған болуы мүмкін деген ақпарат тарады. Алайда полиция бұл мәліметті әзірге растаған жоқ.
Қазір жол-көлік оқиғасына қатысты тергеу амалдары жүргізіліп жатыр. Полиция жүргізушінің нақты кім екенін ресми түрде жариялаған жоқ.
Мәжіліс депутаты Бақытжан Базарбек өз қатысуымен болған жол-көлік оқиғасына қатысты әлеуметтік желіде тараған ақпараттарға байланысты пікір білдірді.
Депутат қазіргі уақытта оқиғаға қатысты тергеу амалдары жалғасып жатқанын айтты. Оның сөзінше, қозғалған қылмыстық іс бойынша сотқа дейінгі тергеп-тексеру жүргізіліп, қажетті сараптамалардың нәтижесі күтілуде.
Бақытжан Базарбек оқиғаның барлық мән-жайына тергеу органдары заң талаптарына сәйкес объективті әрі әділ баға беретініне сенім білдірді.
«Мен үшін ең бастысы – зардап шеккен азаматтың өзі, оның жақындары мен туыстарының қасында болып, оларға қажетті көмек көрсету», – деді депутат.
Ол сондай-ақ бірнеше күн бойы отбасымен бірге зардап шеккен азаматтың сауығып кетуін тілеп, дұға жасап отырғанын жеткізді.
Бақытжан Базарбек көрсетілген медициналық көмек үшін аудандық аурухана дәрігерлеріне, Денсаулық сақтау министрлігіне және облыстық денсаулық сақтау басқармасына алғысын білдірді.
