2027 жылғы маусымға «Кең дала-2» бағдарламасы бойынша жылдық 5%-бен 200 млрд теңге қарастырылған, өтінімдерді қабылдау басталды, деп хабарлайды AstanaTV.
Мемлекет басшысы Қасым-Жомарт Тоқаевтың 2024 жылғы 15 қарашадағы ауыл шаруашылығы қызметкерлерінің бірінші форумында берген тапсырмаларын жүзеге асыру шеңберінде елімізде мемлекеттік қолдау жүйесі ерте қаржыландыру тетігіне көшірілді.
Бұл тәсіл шаруашылықтарға тұқымдарды, тыңайтқыштарды, отын мен бөлшектерді алдын-ала сатып алуға, техниканы дайындауға және дала жұмыстары басталғанға дейін қаржылық жүктемені жеңілдетуге мүмкіндік береді.
Өтінімді шаруалар Аграрлық кредиттік корпорацияның филиалдары, екінші деңгейлі банктер, кредиттік серіктестіктер, әлеуметтік-кәсіпкерлік корпорациялар, өңірлік инвестициялық орталықтар және микроқаржы ұйымдары арқылы бере алады. Қосымша ақпаратты 1408 нөмірі бойынша алуға болады.
Дала жұмыстарын қаржыландыру көлемі 1,8 есеге жуық өсті
Соңғы үш жылда егін егу және жинау жұмыстарын қаржыландыру көлемі 2024 жылғы 421 млрд теңгеден 2026 жылы 750 млрд теңгеге дейін ұлғайды. 2026 жылғы 28 қыркүйектегі жағдай бойынша шаруаларға 664,4 млрд теңге берілді, соның аясында 8 млн гектардан астам аумақ қамтылды.
Кепілдіктер қарыз сомасының 85%-ына дейін жабады
Кепіл базасы жеткіліксіз шаруашылықтар үшін кепілдік беру тетігі жолға қойылған. 2026 жылы қарыздардың жалпы сомасы 274,2 млрд теңге болатын 1 735 кепілдік берілді. Қаражат екінші деңгейдегі банктер, кредиттік серіктестіктер, әлеуметтік-кәсіпкерлік корпорациялар және Аграрлық кредиттік корпорацияның филиалдары арқылы беріледі.
2026 жылғы егін егу жұмыстары белгіленген мерзімде өтті
Жалпы егіс алқабы 24,2 млн гектарды құрады, бұл өткен жылмен салыстырғанда 597 мың гектарға артық. Шаруашылықтар үшін литріне 281 теңгеден 402,3 мың тонна жеңілдікті дизель отыны бөлінді, тұқым қоры 2,3 млн тонна көлемінде жиналды.
Қыркүйек айының соңына дейін астық алқаптарының 83% жиналды
Бүгінгі таңда 13,5 млн гектар алқаптан астық жиналды, орташа өнімділік – гектарынан 14,7 центнер. Осы кезеңде 19,9 млн тонна астық бастырылды. Лицензиясы бар астық қабылдау кәсіпорындарына 4,9 млн тонна жаңа өнім түсті, бұл өткен жылмен салыстырғанда 20%-ға артық.
Фермерлерді қолдау жүйесі жеңілдікті несиелеу көлемінің өсуі есебінен ғана емес, сонымен қатар қаржыландыруға ертерек қол жеткізу есебінен де өзгеруде. 2027 жылғы маусымға дайындықтың жаңа циклі осы жылдың аяғына дейін басталады.
